Һары кейем ярамай

Рәсәй
Башҡа илдәрҙә йәшәүселәрҙе беҙҙәге традициялар аптыратыуы ихтимал. Мәҫәлән, Чукоткала һаман да левират ҡануны бар. Ағаһы (ҡус­тыһы) үлеп ҡалһа, егет еңгәһенә (килененә) өйләнергә, балаларын тәрбиәләргә бурыслы. Бындай йола беҙҙә лә булғанын китаптарҙан уҡып беләһегеҙҙер.

Ирландия
29 февраль үҙенсәлекле көн һанала: ҡыҙ оҡшатҡан егетенә үҙе тәҡдим яһай ала. Ул риза булырға тейеш. Кире осраҡта бик ҙур штраф түләйәсәк.

Малайзия
Һары төҫ – айырылышыу билдәһе. Шуға был дәүләттә парҙар һары кейем кеймәй, биҙәүес таҡмай.

Мавритания
Ябыҡ ҡыҙҙарға бында иҫтәре китмәй. Тулыраҡ булған һайын яҡшыраҡ! Был матурлыҡ һәм сәләмәтлек билдәһе һанала. Шуға ир-ат һөйгәнен күберәк ашатырға тырыша (һүрәттә).

Таиланд
Ҡыҙҙы еңел генә осрашыу­ға саҡырып булмай икән был илдә. Тәүҙә уның ата-әсәһенә аҡса түләргә кәрәк.

Сәғүд Ғәрәбстаны, Пакистан
Мосолмандар күпләп йәшәгән был илдәрҙә Изге Валентин көнөн үткәреү тыйыл­ған.

Көньяҡ Корея
Мөхәббәт көнө 3 тапҡыр билдәләнә: февралдә ҡатын-ҡыҙҙар ир-атты тәмлекәстәр биреп ҡотлай, бер айҙан, киреһенсә, гүзәл заттар байрамы. Һуңынан йәрҙәр лапша ашарға тағы осраша.