Саҡырылған ҡунаҡтар һәм яҙыусының ижадын яратыусылар йыйылды байрамға. Ул һәйкәлгә сәскәләр һалыуҙан башланды. Әлбиттә, шағирҙың ҡыҙы, Мостай Кәрим исемендәге фонд етәксеһе Әлфиә апай килгәйне. Тантанала шулай уҡ Өфө хакимиәте башлығы Ратмир Мәүлиев сығыш яһаны. Беҙ барыбыҙ ҙа Мостай Кәримдән өлгө алабыҙ, тине ул. Башҡортостандың халыҡ шағиры Ҡәҙим Аралбай ҡәләмдәшенә арналған шиғырын уҡып ишеттерҙе. Артабан ҡала мәктәптәре уҡыусылары һәм Милли йәштәр театры артистары йырланы, шиғырҙар һөйләне. Ә Мостай Кәрим исемендәге фонд гранттарына Өфө фән һәм технология студенттары лайыҡ булды.