"Ҡайһы яҡтың башҡорто һин, һылыуым?"

ҠАЙҺЫ ЯҠТЫҢ БАШҠОРТО ҺИН, ҺЫЛЫУЫМ? “Ҡайһы яҡтың башҡорто һин,
һылыуым?" —
Һорау бирҙе шулай бер апай.
“Бигерәк тә инде тәмләп һөйләшәһең,
Онотманың телде ҡайһылай?”
Телде нисек оноталар икән, —
Шаңҡып торҙом бер аҙ, бер талай. Мәңге үлмәҫ бер зат булып
Телем тыуған ғәзиз еремдә.
Шиғырҙарым илһам ҡанатында
Башлап тыуа ошо телемдә. Ошо телдә тәүләп “әсәй” тинем,
Илгенәйем йөрәк түремдә.
Һөйгәнемә “һөйәм” тиеп әйттем,
“Балам” тинем тыуған көнөндә. Көйөргәҙе буйы башҡорто мин,
Айҙай битле башҡорт апайым.
Әсә һөтө менән кермәгәндә
Орлоҡ һүҙҙе ҡайҙан алайым. Ҡаҙлайырҙың һыуын эсеп үҫтем
Кендек ҡаным тамған еремдә.
Хур итмә, тип ауылдаштар ҡалды
Ҡашҡа тауға менгән үремдә. Тап төшөрмә йөҙгә, балам, тиеп
Күҙ алдымда тора инәйҙәр.
Тағы ниндәй яңылыҡтар бар, тип
Хәл һораша кеүек еңгәйҙәр. Минең намыҫ хыянатсы булһа,
Ғәфү итмәҫ затым, илем дә.
Шуға ла бит әсә һөтө тәме
Торған кеүек туған телемдә!