+15 °С
Болотло
TelegramVKOK
Бөтә яңылыҡтар
Хоккей
21 Сентябрь 2018, 13:45

Алға, юлаевсылар!

«Аҡ Барс» менән уйын, ысынлап та, көткәнебеҙсә, ҡыҙыҡлы һәм көсөргәнешле булды. Юлаевсылар алышҡа ныҡлы әҙерләнгән кеүек ине. Беҙҙекеләр һөжүм артынан һөжүм ойоштороп, уйынды әүҙем башлап ебәрҙе. Шуғалыр ҙа Ҡазан хоккейсылары ни эшләргә белмәне, тәүге ике осорҙа әллә ни ҡаршылыҡ күрһәтмәне улар. Иҫәп 3:0, 4:1 бул­ғас, «Салауат Юлаев» иртә тыныс­ланды, шикелле. Әллә хәлдәре бөттө. Өсөнсө осор ҡунаҡтарҙың өҫтөнлөгө менән үтте. Иҫәпте тигеҙләп ҡуйҙылар.

Юлаевсыларға өсөнсө тапҡыр өҫтәмә ваҡытта уйнарға тура килде. Тик был юлы отолдолар шул – 4:5. Был уйында Линус Умарк тәүге голын индерҙе. Антон Бурдасов та мәргәнлеген күрһәтте.
Еңеп барған ерҙән мәрәй юғалттылар. Ныҡ ҡыйын булды хоккейсыларыбыҙға, көйәрмәндәргә...
«Нефтехимик» (Түбәнге Кама) менән осрашҡанда был ныҡ һиҙелде. Уйын бөтөнләй барманы. Хоккейсыларыбыҙ боҙҙа арыған, йоҡолары туймаған кеүек күренде. Шайба артынан өлгөрмәнеләр, тупаҫ хаталандылар. Шуға ла еңелделәр инде – 1:3. Беҙҙең берҙән-бер гол – Дмитрий Кугрышев иҫәбендә.
«Себер» (Новосибирск) менән уйын нисек булыр? Иң артта килгән команда юлаевсыларға ҡаршылыҡ күрһәтә алырмы? Шундай һорауҙар борсоно көйәрмәндәрҙе. Ысынлап та, «Себер» ауыр хәлгә тарыны: бер-бер артлы ете тапҡыр еңелеү кисер­ҙеләр. Уйындары бармағас, баш тренерҙарын отставкаға ебәрҙеләр. Хәҙер яңыһын ҡуйҙылар. Әммә барыбер хәлдәре бер ҙә яҡшырырға оҡшамаған. Беҙҙең хоккейсылар уларҙы еңел генә 3:1 иҫәбенә отоп ҡайтарҙы. Голдарҙы Йоонас Кемп­пайнен, әлеге лә баяғы Антон Бурдасов һәм Линус Умарк индерҙе.
«Салауат Юлаев» үҙ дивизионында һигеҙ уйындан һуң 11 мәрәй менән икенсе урында килә. «Авангард»тан ғына ҡалышабыҙ.
Һаман да йәрәхәтләнгән хоккейсыларыбыҙ күп. Григорий Панин менән Захар Арзамасцевҡа Александр Кадейкин өҫтәлде. Төп уйынсыларыбыҙ бит улар. Ә бына Юха Метсола һауыҡты, «Себер» менән осрашҡанда ҡапҡаны ул һаҡланы. Ышаныслы торҙо.
22 сентябрҙә «Барыс» (Астана) килә. «Өфө-Арена» туп-тулы булһын ине. Юғиһә, һуңғы уйындарҙа көйәрмәндәребеҙ ныҡ кәмегән икән.

М. КӨЙӘРМӘНОВ.

Читайте нас: