-4 °С
Ҡар
Бөтә яңылыҡтар
Хоккей
17 Июль 2020, 14:06
Юлаевсылар боҙға сыға
Ниһайәт, командабыҙ йыйылып бөттө! Һуңғылар булып, сит илдән баш тренерыбыҙ Томи Ламса, физик әҙерлек буйынса тренерыбыҙ Матиас Сарвела, ҡапҡасыбыҙ Юха Метсола, һаҡсыбыҙ Филип Ларсен, һөжүм итеүселәребеҙ Теему Хартикайнен һәм Сакари Маннинен Өфөгә ҡайтып етте. Хәҙер инде тағы ла бер легионерҙы – Маркус Гранлундты ғына көтөргә ҡалды.
Был фин хоккейсыһы НХЛ-да «Эдмонтон» клубында уйнай ине. Көслө генә һөжүм итеүсе, тип маҡтайҙар. Юлаевсылар составында ул Линус Умарк урынына саҡырылды. Нисек уйнап китер, командабыҙҙа лидер була алырмы? Уныһын, әлбиттә, ваҡыт күрһәтер.
Тағы ла бер һөйөнөслө хәбәр: Американан йәш һөжүм итеүсебеҙ Михаил Воробьёв ҡайтты! Үҙебеҙҙең хоккей клубы тәрбиәләнеүсеһе. Хәтерегеҙгә төшөрәбеҙ: ул «Салауат Юлаев»та Кирилл Капризов менән бергә уйнағайны, йәштәр араһында уҙған донъя беренселегендә бронза миҙал яулағайны. Иң күп пас биреүсе булып та танылғайны. Михаил Воробьёв Ҡазанға ҡайтып киткән Александр Бурмистровты алмаштырасаҡ, тиһәң дә була. Алла бирһә, боҙға Никита Сошников һәм Дмитрий Кугрышев йә Родион Әмиров менән бергә сығасаҡ.
Командабыҙҙа башҡа үҙгәрештәр ҙә бар. Белеүегеҙсә, Николай Цулыгин хәҙер баш тренер түгел, уның урынына Томи Ламса ҡуйылды. Был хәл күптәрҙе аптыратты. Плей-оффта юлаевсылар һоҡланғыс уйын күрһәткәйне. Ярай әле Цулыгин команданан китмәне, Ламсаға ярҙамсы итеп ҡалдырылды.
Әйтергә кәрәк, юлаевсылар ярайһы ғына юғалтыуҙар кисерҙе. Әлбиттә, иң ҙуры – Линус Умарк. Ул клуб өсөн генә түгел, бөтә КХЛ өсөн дә ҙур юғалтыу. Хоккей йондоҙо ине бит! Унһыҙ ҡыйын булыр инде беҙҙең командаға. Шулай уҡ ҡапҡасы Андрей Кареев, һаҡсылар Артём Сергеев, Захар Арзамасцев, Михаил Пашнин, Станислав Гәрәев, һөжүм итеүселәр Максим Майоров, Илья Крикуновтар беҙҙә уйнамаясаҡ.
Берәүҙәр китә, икенселәре килә. Хоккейҙа шулай инде, командалар йыл һайын үҙгәреш кисереп тора. Әйҙәгеҙ, «Салауат Юлаев»тың бүтән яңы килгән хоккейсылары менән дә танышайыҡ. Улар – ҡапҡасы Владислав Сухачёв («Трактор», Силәбе), һаҡсылар Евгений Бирюков («Металлург», Магнитогорск), Дмитрий Коробов («Амур», Хабаровск), Игорь Мясищев (ЦСКА, Мәскәү), һөжүм итеүсе Александр Чёрный (ЦСКА).
Әйткәндәй, яңыраҡ һаҡсылар Шакир Мөхәмәҙуллин, Павел Елизаров һәм һөжүм итеүсе Родион Әмиров Рәсәй йәштәр йыйылма командаһына саҡырылды. Сочи ҡалаһында уҙасаҡ турнирға әҙерләнәләр. Был йәш хоккейсыларыбыҙҙың матур ғына уйнап китеүҙәренә өмөт итә тренерҙарыбыҙ. Шунһыҙ булмай ҙа, киләсәкте уйларға кәрәк. Ситтән ҙур эш хаҡына уйынсы саҡырғансы үҙең тәрбиәләү, үҫтереү отошлораҡ. Йәнә көслө хоккейсыны эҙләп табыуы ла ҡыйын хәҙер. Уларҙың бөтәһе тиерлек НХЛ-да уйнап йөрөй.
Юлаевсылар алдағы хоккей миҙгеленә әҙерлекте 14 июлдә башланы. Тәүҙә медицина тикшереүе булды. Илдәге хәлде белеп тораһығыҙ, коронавирус һаман туҡталмай. Шуға ла тренерҙарыбыҙ әҙерлеккә күп үҙгәрештәр индерҙе. Күнекмәләр, ахырыһы, тик үҙебеҙҙә генә үтер, сит илдәргә сығыу әлегә мөмкин түгел.
Хоккей һағындырҙы. Бөтәһе лә һәйбәт булһа, КХЛ-да тәүге уйындар 2 сентябргә планлаштырыла. Ә уға тиклем 10 – 13 августа Өфөлә йолаға әйләнгән Башҡортостан Республикаһы кубогына турнир уҙасаҡ. Был алышта «Салауат Юлаев» «Трактор» (Силәбе), «Нефтехимик» (Түбәнге Кама) һәм «Северсталь» (Череповец) командалары көс һынашасаҡ. Шунан инде беҙҙең хоккейсылар Ҡазанда ойошторолған турнирға юллана. Башланды хоккей! Юлаевсыларға уңыштар теләйек.
М. КӨЙӘРМӘНОВ.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж