Бер юлы - өс еңеү

Өфөгә көслө командалар килгәйне. Хәтерегеҙҙә бул­һа, уҙған миҙгелдә беҙҙекеләр плей-оффта «Трактор»ҙан еңелеп ҡуй­ғайны.
«Йәшел дерби» – ике республика көйәрмәндәренең дә көтөп алған уйыны. Билеттар әллә ҡасандан һатылып бөтә. Хатта хоккейҙан алыҫ тор­ған кешеләр ҙә тап ошо ике команда алышы менән ҡыҙыҡһыналыр ул. «Салауат Юлаев»мы, «Аҡ Барс»мы?
Осрашыу беҙҙең өсөн уңышлы булды. Уйын 5:3 иҫәбе менән тамамланды. Голдарҙы Глеб Кузьмин, Нейтан Тодд, Ярослав Цулыгин, Александр Хмелевский һәм Шелдон Ремпал индерҙе. Хоккей белгесе һәм комментатор Артём Батрак:
– Матч ҡыҙыҡ үтте. Айырыуса бе­ренсе осорҙо тын да алмай ҡараусылар күп булғандыр. «Аҡ Барс»тың беренсе звеноһы ғына яҡшы уйнаны, тип уйлайым. Ә бына юлаевсыларға килгәндә, ҡаршы яҡ командаларҙан ошондай фекер ишеткәнем бар – улар боҙҙа күп кеүек: һәр мөйөштә, ҡапыл ни эшләргә лә белеп булмай. Яҡшы физик әҙерлек тә еңергә ярҙам итә. Был юлы Цулыгин, Нәби­ев һәм Сучков оҫта уйнаны, – тине.
«Трактор» менән осрашыу ҙа беҙҙең өсөн яҡшы тамамланды. Уйын барышында Джошуа Ливо бер гол индерҙе. Ул иҫәпте тигеҙләне – 1:1. Овертаймда еңеүсе билдәләнмәгәс, буллиттар серияһы башланды. Ура, хәл иткес гол авторы – йәнә Джошуа!
Өсөнсө уйында «Автомобилист» клубын да (Екатеринбург) еңеп ҡайтарҙыҡ – 5:3. Александр Шаров ике гол индерҙе, ә Шелдон Ремпал иң яҡшы уйынсы булып танылды.