Ура, Ремпал беҙгә ҡайтты!

«Салауат Юлаев» клубы һөжүмсе Шелдон Ремпалдың беҙгә кире ҡайтыуы хаҡында хәбәр итте. 30 йәшлек хоккейсы миҙгел башынан «Вашингтон Кэпиталз» составында 4 кенә уйын уҙғарып өлгөрҙө. Хәҙер беҙҙең команда менән килешеүен яңыртҡан. Уның боҙға 5 ноябрь сығыуы көтөлә. 
Үткән миҙгелдә Ремпал көйәрмәндәр хәтерендә яҡшы яҡтан ғына уйылып ҡалды. Даими чемпионатта 68 уйында 61 мәрәй йыйҙы, ә плей-оффта 19 матчта 21 гол индерҙе. Ошо рәүешле ул иң мәргән уйынсылар исемлегендә 4-се баҫҡысҡа күтәрелеүгә өлгәште. Гагарин кубогы өсөн көрәштә иң яҡшы күрһәткес тә – Шелдондыҡы.
Буласаҡ хоккейсы Канаданың Калгари ҡалаһында тыу­ған. «Лос-Анджелес Кингз», «Каролина Харрикейнз», «Ванкувер Кэнакс», «Вегас Голден Найтс» командалары өсөн уйнаған. Быйыл да ул юлаевсылар составында үҙен яҡшы яҡтан ғына күрһәтер, тип ышанабыҙ.