Китапханабыҙҙа Ҡоштар көнөнә арнап «Минең яҡын дуҫтарым» исемле кисә үткәрҙек. Балалар менән ҡанатлы дуҫтарыбыҙ хаҡында әңгәмә ҡорҙоҡ, йомаҡтар систек, шиғырҙар һөйләнек. Уларҙың төрҙәрен, исемдәрен иҫкә төшөрҙөк, иң ҙур ҡош – дөйәғош, ә иң оҙон тел тумыртҡала икәнен белдек.
Һәр бер ҡоштоң үҙ вазифаһы булыуы хаҡында ла ҡыҙыҡһынып тыңланы балалар. Мәҫәлән, тумыртҡа ағастарҙағы ҡоротҡос бөжәктәрҙе юҡ итә. Шуға ла үҙен «урман табибы» тип йөрөтәләр. Был ҡош ҡаты ҡойроғо менән ағас ботағына терәлеп, уға көслө тырнаҡтары менән йәбешә. Шунан суҡышы менән ағасты туҡ-туҡ соҡоп, бөжәкте эҙләп таба һәм теле менән эләктереп алып ашай. Шулай итеп, үҙе лә туҡлана, урманға ла файҙа килтерә. Тумыртҡалар ағас ҡыуышына оялай. Улар бер-береһен туҡылдаған тауыштарынан да таный икән.
Ҡыҙылтүштәр – тәбиғәттең биҙәге ул. Шул тиклем матурҙар. Яҙын, йәйен урманда йәшәһәләр, ҡышын баҡсаларға, парктарға осоп килеп, ағас орлоҡтары, еләк-емеш ҡалдыҡтары менән туҡланалар.
Ҡоштар – беҙҙең дуҫтарыбыҙ ғына түгел, ярҙамсыларыбыҙ ҙа. Улар иген ҡоротҡостарын да ашай, үҫемлектәрҙе һәр төрлө зыянлы бөжәктәрҙән һаҡлай. Үҫемлек орлоҡтарын тараталар, сәскәләрҙе һеркәләндерәләр.
Тәбиғәт күрке булған ҡоштарыбыҙҙы һәр беребеҙ һаҡларға, яҡларға бурыслыбыҙ. Әйҙәгеҙ, дуҫтар, уларға ояларҙы күберәк яһайыҡ. Һәр ҡайһыбыҙ берәрҙе эшләһә лә, ҡоштарға ниндәй ҙур ярҙам булыр ине.
Әлфиә ВӘЛИЕВА, китапханасы.
Илеш районы, Үрге Йәркәйҙәге моделле балалар китапханаһы.