Фәрзәнә Ғөбәйҙуллинаны республикала белмәгән кеше юҡтыр. Тынғыһыҙлыҡ – уның булмышы. Бала сағынан әкиәттәр, хикәйәләр, шиғырҙар, сценарийҙар ижад итә, башҡорт балалар яҙыусыларының әҫәрҙәрен – урыҫ теленә, урыҫ яҙыусыларыныҡын башҡорт теленә тәржемә итә, бик күп мәҡәләләр яҙа.
Таныштырыу тамамланғас, һүҙ яҙыусының үҙенә бирелде. Фәрзәнә Хәйбулла ҡыҙы уҡыусыларҙы төрлө йылдарҙа яҙылған йыйынтыҡтары менән таныштырҙы. Мәҫәлән, «Башҡортомдан батыр юҡ икән», «Дүртенсе мөғжизә», «Илебеҙ беҙҙең ожмахтай»... Был китаптарға мәктәпкәсә йәштәге һәм башланғыс синыф уҡыусыларына тәғәйенләнгән әҫәрҙәре тупланғанлығын һәм улар барыһы ла тормоштан алынғанлығын әйтте. Шулай уҡ унда тыуған яҡтың гүзәллегенә һоҡланыу, матурлыҡҡа ынтылыу, донъя йәмен күрә белеү, тирә-йүндә йәшәгән барлыҡ йән эйәләренә ҡарата шәфҡәтле булыу серҙәрен асҡан шиғырҙары, хикәйәләре, әкиәттәре инеүен һөйләне. Ҡайһыларын уҡып та күрһәтте.
Балалар ҙа осрашыуға әҙерләнеп килгән. Яҙыусының шиғырҙарын матур итеп һөйләп ишеттерҙеләр. Аҙаҡтан бергәләп иҫтәлеккә фотоға төштөләр.
Зәйтүнә ХАЖИЕВА, китапханасы.
Өфө ҡалаһы, 30-сы моделле балалар китапханаһы.