Белем донъяһына — китапхана аша

Яңы уҡыу йылы башланыуға арналған сараның мөһим бер өлөшө, моғайын, вәғәҙә ҡабул итеү тантанаһы булғандыр. Кескәй дуҫтарыбыҙ ата-әсәләре һәм китапхана хеҙмәткәрҙәренең алҡыштары аҫтында  «Беренсе синыф уҡыусыһы» тигән ғорур исемде лайыҡлы, намыҫлы йөрөтөргә һүҙ бирҙеләр. Шулай уҡ тырышып уҡырға, ҡыҙыҡһыныусан булырға, өлкәндәрҙе хөрмәт итергә, китаптарҙы һаҡларға һәм һәр ваҡыт иптәштәренә ярҙам ҡулы һуҙырға әҙер булыуҙарын да еткерҙеләр. 
Байрамдың Кесе Ватаныбыҙ менән танышыу өлөшөндә ҡыҙҙар һәм малайҙар Башҡортостандың тарихы, үҙенсәлекле тәбиғәте тураһында мәғлүмәт алды. Тыуған ҡалабыҙ Сибайыбыҙ тураһындағы сағыу китаптарҙы айырыуса ҡыҙыҡһынып ҡараны улар. Һуңынан китапхана мөдире Р.З. Ҡунаева барыһын да уҡыу залында урынлашҡан тирмәгә саҡырҙы һәм ундағы экспонаттар тураһында һөйләне.
Сара аҙағында Сибай ҡалаһы һаулыҡ һаҡлау хеҙмәткәрҙәре профсоюзы ойошмаһы рәйесе, РФ атҡаҙанған профсоюз хеҙмәткәре, ҡала башҡорттары ҡоролтайындағы һаулыҡ һаҡлау һәм демография комиссияһы рәйесе
Марат Басир улы Шәрипов балаларға бүләктәр тапшырҙы.

Сығанаҡ һәм фото: "Бәйләнештә"ге "Сибай башҡорттары ҡоролтайы" төркөмөнән. //vk.ru/wall