Илһөйәрҙәр шундай була!

Данил махсус хәрби операцияға ҡағылышлы яңылыҡтарҙы уҡып-күҙәтеп бара. Уға хәрби тематика яҡын икән. Бәләгә ҡалған кешеләргә ярҙам итергә генә тора, ныҡ изге күңелле бала, тинеләр уның хаҡында. Мәҫәлән, дүрт йыл элек ДЦП диагнозлы малайға ярҙам йөҙөнән 2 мең аҡсаһын күсергән. Был хәбәр социаль селтәрҙәрҙә таралғас, битараф булмаған кешеләр «һә» тигәнсе етмәгән сумманы йыйып та ҡуйған. Шулай итеп, Глебҡа кәрәкле ярҙам күрһәтелгән.
Өфөләге Мөхәмәтғәле Исҡужин исемендәге 136-сы башҡорт лицейында белем алыусы Данил яҡшы өлгәшә, физика, геометрия, алгебраны үҙ итә. Музыка менән шөғөлләнә: ҡурайҙа уйнай, сольфеджио, хорға йөрөй. Йәнә футбол менән дуҫ. Шайморатовсылар синыфында уҡығас, иптәштәре менән бергәләп Еңеү парадында, Республика көнөнә арналған байрамдарҙа сығыш яһап торалар. Ә йәш шайморатовсылар сафына ҡушылырға үҙе теләк белдергән ул. Уҡыуын яҡшы тамамлап, программист һөнәрен үҙләштермәксе. Тәүҙә был маҡсатта ноутбук алырға хыяллана. Уның өсөн аҡса туплай башлаған да инде: Данил мәктәптән һуң листовкалар таратырға өлгөрә.
– Саҡ балалыҡтан сығып барһа ла, шундай төплө фекер йөрөтә ул. Төрлө темаларға һөйләшәбеҙ. Данил махсус хәрби операцияның тиҙерәк тамамланыуын теләй. Унда үҙебеҙҙең дә туғандар, таныштар бар бит, – ти әсәһе Лилиә ханым.
Беҙ ҙә үҫмерҙең теләгенә ҡушылабыҙ: донъяла тыныслыҡ урынлаш­һын!