“Хайуандар янында булыу ныҡ оҡшаны”

Көндөҙгө лагерҙа ял итеү балаларҙың барыһына ла ныҡ оҡшаған. Уларҙың һәр көнө иҫтәлекле һәм йөкмәткеле үткән. Хатта кинотеатрҙа – фильм, ҡала театрҙарында мауыҡтырғыс спектаклдәр ҡарарға ла өлгөргәндәр. Шулай ҙа иң ныҡ иҫтәлеклеһе  "Яратҡан ат һарайы" клубына барыу булған икән. Балалар хайуандарҙы ғына ҡарап йөрөмәгән, ә өйҙән алып килгән ризыҡтары менән уларҙы һыйлаған. "Минекен ашай, тағы күстәнәс һорай", – тип сыр-сыу килгән бала-саға.

Тағы ла тәрбиәсе Сәриә Фазулла ҡыҙы Ишкининаның башҡорт телендә ойошторған викторинаһы ҡыҙыҡлы булған. Яратҡан "Йәншишмә" гәзите хаҡында ла һөйләшкәндәр. Иҫтәлеккә фото төшкәндәр, йырлап та алғандар.

Ә бына лагерҙы ябыу сараһында 6-сы отряд ҡыҙҙары барыһын да һоҡландырған. Улар "Бесәй, Әтәс һәм Төлкө" әкиәтен оҫта итеп сәхнәләштереп, приз-күстәнәс яулаған. Һай, афариндар!

Бына шулай уҡыусылар бик ҡәнәғәт ҡалып, лагерҙың етәкселенә, тәрбиәселәргә һәм ашнаҡсы апайҙарына рәхмәт әйтеп, өйҙәренә таралышҡан.