Хикәйә
Йәй еттеме, Айназ ауылға өләсәһенә килә. Йәнәһе лә, cәхнәләрҙән арып, бер аҙ ял итә. Бәләкәй генә баланың ниндәй концерттары булһын, тиерһегеҙ. Уны ҡалала «бәләкәй әртис» тип беләләр. Гармунда ла уйнай, ҡурайҙа ла һыҙҙыра, дәртләнеп таҡмаҡтарын да яуҙыра, өҙҙөрә баҫып бейеүе менән дә халыҡты таң ҡалдыра. Бер мәл шулай «Ҡарға бутҡаһы» байрамында әсәһе ике йәшлек Айназды йомошсо малай ролендә сығара. «Улым, инәйҙәр, апайҙар, ҡунаҡтар килә, һин, ҡунаҡтар килә, тип ҡысҡырып әйт, шә-ә-әп итеп ҡысҡырып әйт, йәме», – тип бер нисә тапҡыр ҡабатлата. Мейеһенә һеңдергән һүҙҙәрҙе һүҙмә-һүҙ еткерергә тырыша Айназ:
– Инәйҙәр, апайҙар, ҡунаҡтар килә! Шә-ә-әп итеп... ҡунаҡтар килә!
Тамашасылар, ысынлап та, шәп итеп ҡунаҡтар килә, тип уйлағандыр, моғайын, ә был өйрәтеүҙең ғилләһен аңлаған әсәһе аҙаҡ эстән генә рәхәтләнеп көлә.
Байрам булһынмы йәки баш ҡаланан ҡунаҡтар килһенме, малайҙы тамашала ҡатнаштыралар. Гел сәхнәлә йөрөй торғас, оҫтарып та алды. Бер мәл Айназды һаулыҡтары сикләнгән балалар алдында концерт ҡуйырға саҡыралар. Ҙур иркен залдарҙа, күмәк халыҡ алдында һөнәрен күрһәтергә яратҡан «йәш әртис»:
– Шулай әҙ генә кешеләр алдында бейейемме ни? Үҙҙәре лә ҡыҙыҡ ҡыналарсы... – тип ысҡындыра.
Әсәһе тәүҙә баҙап ҡала, ләкин тиҙ генә үҙен ҡулға алып, уны бер яҡ ситкәрәк саҡыра ла:
– Улым, был балалар ауырый. Ләкин улар йыр-моңдо ярата. Әҙ генә дәрт һалһаң, йөҙҙәрендә йылмайыу, нур сатҡылары күренә башлай. Бер аҙға ғына булһа ла онотолалар.
– Ысынмы, әсәй? Йырлаһаң, төҙәләләрме? – тип төпсөндө Айназ.
– Һауығалар шул, балаҡайым.
– Әтеү, ауырыуҙары тиҙ бөтһөн тип, мин тырышып-тырышып йырлармын, йәме.
Ошо хәлдән һуң Айназ ҡайҙа һәм кемдәр алдында сығыш яһауға ҡарамаҫтан, йөрәк йылыһын һәр тамашасыға еткерергә тырышты.
Бына әле ул ауылға ял итергә ҡайтты. Тәүге көндәрҙә үҙенән олораҡ иптәше Рәфил менән урам ҡыҙырып сыға. Осраған һәр кешегә әллә ҡайҙан һөрән һалып һаулыҡ һорашыуын олоһо ла, кесеһе лә ҡыҙыҡ күрә. Сөнки Айназ өләсәһенең: «Ҡолонсағым, күпме кешенең һаулығын һорашһаң, Хоҙай Тәғәлә үҙеңә лә шунсама һаулыҡ бирер. Иҫәнләшеү – ул күңелеңде таҙартыу, үҙеңә именлек теләү», – тигән аҡыллы һүҙҙәрен күңеленә һеңдереп үҫкәйне.
Шуға ла малай юлында күберәк халыҡты осратырға теләй, йәнәһе, бихисап кеше менән иҫәнләшәм дә оҙаҡ йәшәйем, тип уйлай.
Айназ донъяһын онотоп, көнө буйы уйнап арый ҙа иртәгеһен төшкә тиклем йоҡлай. Ә бөгөн ни өсөндөр иртүк уянды.
– Һай-һай, ҡояш тупһа аҫтынан килеп ҡалҡмаһын, бөгөн улым иртәләгән икән. Иртә торған иркен йәшәр, ирәйеп йәшәрһең, балаҡайым.
Тамаҡ туйҙырып алғас, урамды байҡап инде. Тегендә һуғылды, бында ултырҙы. Аяҡ аҫтында уралған бесәйҙәй, иркәләнеп өләсәһе янында өйрөлдө.
Хәфизә инәй тәүҙәрәк, бала әсәһен һағынғандыр, килер көнө еткәс, ваҡыт үткәрә алмай аҙапланалыр, тип уйлағайны. Балтаһы һыуға төшкән ейәненең кәйефен нисек күтәрергә икән, тип баш ватҡанда телефондан ҡурай тауышы яңғыраны. Әсәһенең шылтыратыуын күргән Айназ йәһәт кенә алып, тәтелдәп хәбәрен теҙҙе. Һүҙ араһында ейәненең тыуған көнө икәнлеге өләсәһенең келт итеп иҫенә төштө.
– Әй, әттәгенәһе, хәтер тигәнемде әйтәйем, – тип ейәненең ҡолағынан биш тапҡыр шаяртып ҡына тартты ла һүҙен ослап ҡуйҙы. – Тыуған көнөң менән, ҡолонсағым. Хәҙер сумкаларын тултырып әсәйең ялға ҡайтып төшөр инде. Бә-ә-әй, ҡана, байрамға тәмле бәлеш бешерә һалайым.
– Өләсә-ә-ә-й, тыуған көнөм икәнлеген баянан бирле нисек әйтергә белмәй йөрөгәйнем.
– И-и-и-и, ейәнемде! Булмаһа, бер аҙ уйнап тор. Хәҙер бәлеш тә, яратҡан сөсө икмәгеңде лә бешерермен.
Ауылда инәйҙәр һәр саҡ уларҙың өйө алдындағы эскәмйәлә йыйылып, рәхәтләнеп сөкөрҙәшергә ярата. Бөгөн дә йыйылмағандармы икән, тип Айназ ҡапҡа төбөнә сыҡты ла инәйҙәрҙе күреп, йөҙө балҡып китте. Малайҙың һәләтен белгән өлкәндәр уны шәйләү менән таҡмаҡтарын яуҙыра ла башланы. Шуны ғына көткәндәй, Айназ дәртләнеп аяҡтарын тыпырлатырға, яурындарын һикертергә тотондо.
– Йә, улым, шундай көйҙө әрәм итмәсе! – тип Мәрйәм инәһе уны ҡеүәтләп ебәрҙе.
Ғәйникамал инәһе:
– Ҡартатайыңа оҡшатып, дөңкөлдәтә баҫып, йөрәктәрҙе елкендереп, инәйҙәреңдең күңелен күр әле, – тип арҡаһынан тупылдатып һөйөп ҡуйҙы.
Малай йылы һүҙҙәргә иреп, инәлтеп тормайса ихласлап бейей башланы.
Шуныһы ҡыҙыҡ: ауыл кешеләре тамашаны күреп, йәһәт кенә түңәрәк яһаны. Һыуҙан ҡайтып килеүсе һылыуҙар, ауыр биҙрә көйәнтәләүҙәрен дә онотоп, туҡталып ҡараны. Бесәнселәр ҙә арбаларында ҡырын ятып, мыйыҡ аҫтынан ғына йылмайып, малайҙың йырын тыңланы. Олораҡтар өй алдындағы эскәмйәгә ултыра. Күрше Вәлимә инәйҙең ҡалала йәшәгән улы иҫке өйөн ҡутарып, йәтеш кенә йорт һалғайны, шунан ҡалған бер-ике бүрәнә нигеҙ төбөндә күләгәлә ята. Эҫе көндә ҡояштан йәшенеп, инәйҙәр шунда урын ала, әле лә ҡайһы берәүҙәре барып ултырҙы. Бәләкәй балалар, берен-бере этә-төртә, түңәрәктән алғараҡ сығып баҫты. Ҡыйыуыраҡ, дәртлерәктәре ҡулдарын бөйөргә ҡуйып, Айназ бейегәндә уның кеүек хәрәкәттәр яһап маташты.
Ололарҙың таҡмаҡтары бөтөүгә йәш бейеүсенең үҙенең таҡмаҡтары әҙер ине. Ҡулдарын йәйеп, аяҡтарын кирә баҫып, кәүҙәһен артҡа табан ҡайҡайта биреп, шаян таҡмаҡтарын яуҙырҙы.
Урамда йыйылған халыҡты күреп, өләсәһе хафаланып килеп сыҡты. Оҙон керпектәрен елпелдәтеп, күҙендә осҡон сәсрәтеп, ихлас йылмайып йырлап-бейеүсе малайҙы күреп, йөрәгенә йылы йүгерҙе. Элекке йола буйынса бейеүсегә аҡса ташлайҙар. Ана, әле лә инәйҙәр кеҫәләренән тәңкәләр сығарып, малайҙың аяҡ аҫтына һипте.
– Әй, әүрәткес! Мин бит мейескә бәлеш ултыртҡайным, усаҡҡа сөсө икмәк күмгәйнем. Донъямды онотоп ултырам дабаһа! – тип Хәфизә инәй еңел кәүҙәһен елпелдәтеп, өтәләнеп, өйгә ашыҡты.
– Ейәнемдең тыуған көнө, ҡыҙым ҡайтҡансы, күрше-тирәм йыйылғанда, бер һылтауҙан, сәйгә саҡырайым әле. Һәр береһендә аят ашында булдым...
Кисә генә һыйыры быҙаулағайны, ыуыҙ һөтөнә ҡоймаҡ ҡойоп алды. Аш-һыуға оҫта Хәфизә инәй, ҡоро сәй булмаһын, тип йәһәт кенә бутҡа бешереп, һыуынмаһын өсөн өҫтөн сепрәк ашъяулыҡ менән ҡапланы ла йәнә урамға сыҡты.
Айназ кәртә башынан өләсәһенә ҡул болғаны:
– Өләсәй, бынан автобус килгәне күренә, әсәйемде ошонан ҡарайым, йәме.
– Ярар, ҡолонсағым!
Ул сыҡҡанда халыҡ таралған, әммә күләгәлә оҙаҡ йылдар ҡатышып йәшәгән ут күршеһе менән ике әхирәте сөкөрҙәшеп ултырыуын күреп ҡыуанды.
– Әй, күршеләрем, ейәнемдең тыуған көнөндә, әйҙәгеҙ, сәй эсеп алайыҡ.
– Һау-сәләмәт, тәүфиҡлы булһын инде балаҡай.
– Ырыҫлы, бәхетле булһын!
– Теләктәрегеҙ ҡабул булһын, әхирәттәр. Кисә генә һыйырым быҙаулағайны, исемдең дә ниндәйен тапты бит ул! Маңлайында йондоҙо бар, «Йондоҙ» булһын, ти. Өйҙә ҡартымдың һуғыштағы батырлыҡтары өсөн бирелгән йондоҙҙары балҡыһа, йорт-ҡурамды балҡытыусы Йондоҙ ҙа булһын әле, тип уйланым. Тағы ла, ейәнем әртис-йондоҙ булып китһен, тип теләк теләнем.
Күршеләр күңелле хәлдәр һөйләшеп, бәлеште, табындағы һыйҙы маҡтай-маҡтай ашаны.
– Һаумы, улым. Тыуған көнөң менән!
Айгиз әсәһе менән апаһын күреүгә, бесән буйлап шыуышып төштө.
– Мин дә ҡотлайым һине, туғаным, футбол уйнарға яратаһың да инде, бына һиңә бүләгем, – тип Наҙлыгөл ҡустыһына туп тотторҙо.
– Ура-а-а! Бөгөн малайҙарға маҡтанам инде!
– Уныһын булдырырһың. Әйҙә, улым, бергәләп тыуған көн сәйе эсеп алайыҡ.
– Өйҙә инәйҙәр ашап ултыра инде, мин уларға концерт ҡуйҙым, күп аҡса бирҙеләр. Әсәй, ул аҡсаға нимә алырбыҙ икән? – тип тәтелдәне улы.
– Башта өйгә инәйек, инәйҙәргә тыуған көн күстәнәстәрен ауыҙ иттерәйек, шунан һөйләшербеҙ, килештекме?
– Ы-һы-ы.
Ҡаланан ҡайтҡан тәм-том менән тағы ла берәр каса сәй эскән инәйҙәр, рәхмәттәрен уҡый-уҡый, доға ҡылды.
Айназ да өләсәһе кеүек әпәр итте.
– Улым, әпәр иттең дә ул, ә мин бүләгемде тапшырманым бит әле, – тип әсәһе ситтәре милли биҙәктәр менән семәрләнгән ағас һауыт һондо.
Бөтәһе лә дүрт күҙ менән серле һауытҡа төбәлде. Айназ ни икәнен һиҙҙе, шунда уҡ эсенән ҡурайҙы килтереп сығарҙы ла ирененә терәне.
Өләсәһе ауыҙ асып һүҙ әйтергә лә өлгөрмәне, шуҡ малай ҡурайҙа һыҙҙыртып ебәрҙе.
– Ҡыҙым, анауы ҙур рамға ҡуйылған фотолар артынан төргәкте алып бирсе.
– Был яралы ҡурайҙы ҡартым һуғыштан алып ҡайтты, – тине өләсәйҙәре. – Һуғыш тамамланыр алдынан ғына ҡурайсы дуҫы дошман танкыһы аҫтында батырҙарса һәләк була. «Кистәрен уның уйнағанын тыңлап, тыуған яҡтарҙы иҫләй торғайныҡ, ҡайһы берәүҙәр ҡушылып йырлап та ала ине. Һуңынан ҡурайын табып алдыҡ, ҡуйынынан ситкә ырғығандыр, күрәһең, сатнап бөткән ине», – тип һөйләне. Ҡайтҡас, ҡартатайың ошо ҡурайҙы яра бәйләгәндәй, ҡайһы бер урындарын урап, ялғап, ҡоршап ҡуйҙы. «Батыр яуҙа ҡалды, ҡурайы уның данын таратырға ҡайтты», – тип гел генә 9 Май байрамында ҡулына алып, патефонға табаҡсанан ҡурай көйөн ҡуя ине, – тип хәтирәләргә төшөп китте Хәфизә инәй һәм ҡыҙына ҡараны:
– Ҡыҙым, хәтерләйһеңме, һин ҡурай көйҙәре яҙылған табаҡса алып ҡайтҡас, атайың нисек ҡыуанғайны?!
Өләсәһен бүлдереп, ейәне телгә килде:
– Өләсәй, ҡайҙа уйнап ҡарайым әле.
Малай ҡурайҙа уйнауға ҡолаҡҡа ятышһыҙ моң ишетелде.
– Эй, тауышы ҡалай йәмһеҙ сыға, – тип Айназ уйнауҙан туҡтаны.
Өләсәһе ейәненең башынан һыйпаны ла яғымлы тауыш менән:
– Э-э-эй, балам, һуғыштан яраланып ҡайтҡан ҡурайҙың тауышы шулай сыға инде. Ул бит яу хәтирәләрен һаҡлап, һыҡтап көйләй. Иншалла. Оҙон тамырлы ағас оҙаҡ йәшәй, беҙҙең нәҫелдең тарихын ҡурай моңдарың аша киләсәк быуынға еткерергә насип булһын! Уйна, балам! Ҡартатайыңа, уның дуҫына, беҙгә – йәшәү, еребеҙгә – азатлыҡ, халҡыбыҙға ирек бүләк иткән яугирҙәргә ҡоралың дан йырлаһын!
Тауышы көслө булмаһа ла, баланың күңеленән урғылған ҡурай моңо өйгә таралды.