Яҡшыға өмөт итәбеҙ

Унда беҙҙең Яңы Балапан мәктәбе лә ҡатнаша. 14 йәше тулған уҡыу­сылар­ҙан инициатив төркөмдәр төҙөлдө. Улар 5 проектта туҡталды:
– «Тантаналы линейкалар үткәреү өсөн мәктәп алды майҙансығы» (етәксеһе – Дилбәр Рәжәп ҡыҙы Ғибәҙәтова);
– «Мәктәп метеостанцияһы» (Гөлгөнә Миңлегәрәй ҡыҙы Зәйтүнова);
– «Заманса уҡыу кабинеты» (Гөлсара Фәрит ҡыҙы Дауытова);
– «Мәктәптә тренажёр залы» (Эльмира Зөбәйер ҡыҙы Һөйөндөкова);
– «Хәүефһеҙлек мәктәбе» мобиль отряды (Дилә Байгилде ҡыҙы Ҡорманаева).
Инициатив төркөмдәр аҙна аҙағында үҙ проекттарын яҡланы. Һәр береһе презентация үткәрҙе: проект менән таныштырҙы, уның актуаллеген һәм әһәмиәтен билдәләне, һөҙөмтәләрҙе күҙалланы. Сығыштарҙы V – XI синыф уҡыу­сылары иғтибар менән тыңланы, үҙҙәрен ҡыҙыҡһындырған һорауҙар биреп, яуаптар алды.
Һәр сығышты тыңлағандан һуң тауыш биреү ысулы менән иң яҡшы проект һайланды. Иң-иңе – «Тантаналы линейкалар үткәреү өсөн мәктәп алды май­ҙансығы». Ни өсөн тап ошо проект һайланыуы билдәле: мәктәптә акттар залы, спорт залдары булмау сәбәпле, тантаналы саралар тар коридорҙа үтә. Проект республика кимәлендә лә уңыш­ҡа өлгәшһә, беҙҙә лә заманса проектланған майҙансыҡ барлыҡҡа килер ине.
Беҙ яҡшы һөҙөмтәгә өмөт итәбеҙ.

Гөлсибәр БАЙҒӘҘӘМОВА, VII синыф уҡыусыһы.

Әбйәлил районы, Яңы Балапан мәктәбе.