Гимназиябыҙҙа телевидение булдырырға теләйбеҙ

Проектҡа муниципалитеттар яғынан мотлаҡ финанслау (субсидия суммаһынан 10 проценттан да кәм түгел) һәм 14 йәштән өлкән уҡыусылар советы, ата-әсәләр комитеты һәм попечителдәр советы ҡатнашыу ҡаралған.
Республика конкурсына мәктәптән бер генә проект тәҡдиме ителеүе мөмкин. Белем усаҡтарында тикшеренеү эштәре уҙғарыу, спорт һәм ижади саралар үткәреү, мәктәптә ял итеү зоналары, музыкаль студиялар һәм медиаүҙәктәр, кинозалдар булдырыуға, спорт майҙансыҡтарын йыһазландырыуға йүнәлтелгән проекттарға өҫтөнлөк биреләсәк. Уҡыусыларҙың әүҙемлеге мәктәпкә конкурста еңеүгә мөмкинлек бирәсәк. Сөнки проекттарҙы һайлағанда дөйөм мәктәп тауыш биреүендә ҡатнашҡан уҡыусылар һаны, мәктәптә тикшерелгән проекттар күплеге, презентация материалының сифаты һәм башҡалар ҙур әһәмиәткә эйә. Быға тиклем конкурста пилот проект рәүешендә райондар аҙ ҡатнашһа, быйылдан бөтә муниципалитеттар үҙ көсөн һынай ала. Тимәк, конкурсанттарға талаптар ҙа артасаҡ.
Таһир Кусимов исемендәге беҙҙең гимназияла уҡыусылар инициативаһы менән бер нисә проект ҡаралды. Конкурста ҡатнашыу буйынса үткән йыйылышта гимназистар "Мәктәп телевидениеһы", “Уҡ атыу”, “3д шахмат”, “Әбйәлил районының Ҡыҙыл китабы”, “Теплица участкаһы” проекттарын тәҡдим итте. Уҡыусылар әүҙем фекер алышҡандан һуң гимназияның телевидениеһын булдырыу буйынса проектты ҡыҙыҡлы тип билдәләне һәм шуның өсөн тауыш бирҙе. Шулай итеп, Гүзәл Хәйбуллина менән Илсен Ҡужин әҙерләгән проект республика конкурсына сығасаҡ. Гимназия уҡыусыларына уңыштар теләйбеҙ!

Д. ДӘҮЛӘТБАЕВА

Әбйәлил районы,

Асҡарҙағы Таһир Күсимов исемендәге  гимназия.