"Йәш шайморатовсылар балы" йыл да үтәсәк

Сараға республикабыҙҙың ауыл һәм ҡалаларынан 230 өлгөлө йәш шайморатовсы саҡырылғайны. Улар яҡшы уҡый, олимпиадаларҙа, төрлө конкурстарҙа, спорт ярыштарында еңәләр, ирекмәндәр хәрәкәтендә, йәмәғәт эштәрендә әүҙемдәр. 

Тантанала Башҡортостан Башлығы Радий Хәбиров та ҡатнашты. Ул 23 уҡыусыға "Йәш шайморатовсы" почетлы билдәһен тапшырҙы.  

Ҡырмыҫҡалылағы гимназияның VI синыф уҡыусыһы Дарья Шинова I дәрәжә “Йәш шайморатовсы” почетлы билдәһенә лайыҡ булды. Ә Белорет районы Инйәрҙәге 2-се мәктәптән Искәндәр Иҙрисов, Бөрйән районы Байназар мәктәбенән Әмир Мөхәмәтйәнов, М.Ғ.Рәхимов исемендәге 3-сө республика башҡорт интернат-гимназияһынан Айбулат Ғәббәсов, Илеш районы Үрге Йәркәйҙәге 1-се гимназиянан Радим Шәмсетдинов, Ишембайҙағы Ә.Вәлиди исемендәге 2-се башҡорт гимназияһынан Азамат Исламғолов, Республика 1-се полилингваль күп йүнәлешле гимназияһынан Ләйлә Мәмбәтова, Туймазы районы Түмәнәк мәктәбенән Эльвина Вәлиәхмәтова II дәрәжә Почетлы билдә менән бүләкләнде. Тулы исемлекте ошонда ҡарағыҙ: Список награжденных (2024.12.12).pdf 

Йәш шайморатовсылар композиторҙар Рим Хәсәнов һәм Урал Иҙелбаев көйҙәренә вальс, полонез, лендлер башҡарҙы.

Радий Хәбиров белдереүенсә, был сара йыл һайын уҙғарыласаҡ. "Республикала 2 меңдән ашыу йәш шайморатовсы булыуын иҫәпкә алып, балды йыл да уҙғарасаҡбыҙ. Муниципалитеттарҙа ла үтәсәк. Был – илһөйәрлек тәрбиәләү ҙә, бейей белеү ҙә. Ысын команда эше. Шәп килеп сыҡты. Һоҡланып ҡараным", – тине ул.

Фото: glavarb.