-17 °С
Болотло
TelegramТестарVKOK
Бөтә яңылыҡтар
Мәктәп сәхнәһе өсөн
29 Ноябрь 2019, 12:30

Хуш киләһең, Яңы йыл – Сысҡан йылы – Фольклориада йылы!

Ҡатнашалар:Ҡыш бабайҠарһылыуСысҡан Хан – Яңы йылБесәй – диджейМартаАрыҫланТөрлө милләт балалары – ҡунаҡтар.

Биленә билбау таҡҡан, биҙәкле күҙелдерек, башына – ҡалпаҡ, аяғына семәрле итек кейгән Бесәй инә. Ҡулына планшет тотҡан. Уны туҡтауһыҙ баҫҡылай. Эстән генә үҙе нимәлер һөйләнә. Ул ҡулына гитара ала ла йырлай.

Ай-ли гөлкәйем, күбәләк кенәйем,

Һары һандуғасҡайым да

Ҡара ҡарлуғасҡайым,

Ҡара ҡарлуғасҡайым да,

Матур минең гөлкәйем дә

Матур минең илкәйем (шыршы тирәләй бейей).

Ҡыш бабай, Ҡарһылыу инә.

Ҡарһылыу. Һин нимә, башҡорт диджейы, ҡунаҡтарҙы гитара менән ҡаршыламаҡсыһыңмы?

Ҡыш бабай. Сысҡан Ханға әйттем дә ул. Башҡорт иленең брендын күр­һәтәбеҙ, тип.

Бесәй. Сысҡан? (Көлә). Сысҡан Хан буламы? Вәт, була икән Яңы йыл?

Ҡарһылыу. Борон-борондан мөсәлде Сысҡан башлаған. Ҡунаҡтарҙы Бесәй ҡаршылар. Тауышы үтә йомшаҡ, һүҙ оҫтаһы ла, тигән ине.

Бесәй. Тәк, тәк... Әллә ашайым да ҡуяйыммы шуны? Ситтән ҡунаҡтар саҡырып, йөрөй инде кеше ҡаңғыртып.

Ҡарһылыу (Бесәйҙең планшетын алып, WhatsАpp-ҡа инә. Экранда – Сыс­ҡан). Хәйерле көн, Сысҡан Хан! Ҡасан килеп етәһең?

Сысҡан. Хәҙер. «Һеңлекәш» фильмында Йәмил менән Оксананы уйнаған балалар – Арыҫлан менән Мартаны ла саҡырҙым. Улар ҙа оҙаҡламай барып етер.

Ҡыш бабай. Фольклориада Яңы йылын башларға биш минут ҡалды.

Бесәй гитараһын ала ла йырлап-бейей.

Һыҙылып киткән ҡара мыйыҡ

Ҡайҙарҙа йөрөй икән?

Бер көн оҙата килде лә,

Бер көн оҙата килде лә

Әллә ҡайҙа юғалды...

А-а-а-а-а...

Ҡарһылыу. Уй, Аллаҡайым, ҡалайтабыҙ инде? (Смартфонын ала). Алло! Алло! Был ни тигән эш ул, ә?! Ҡунаҡтар килергә тора. Диджей нимә йырлай?! (Смартфон сипылдай, яуап бирмәй, башын тота).

Бесәй. Фонограмма әҙер. Ауыҙымды ҡыбырлатып, ҡабатлап ҡына торам да и всё!

А-а-а, бер көн оҙата килде лә,

А-а-а, әллә ҡайҙа юғалды...

Тышта тауыштар ишетелә, төрлө милләт балалары, башына таж кейгән Сысҡан Хан инә.

Бөтәһе бергә:

Яңы йыл менән!

С Новым годом!

Буан Анна!

З Новим роком!

Мырау. Ҫенкью! Спасибо! Рәхмәт!

Ҡарһылыу сәксәк тота. Бесәй ҡурайҙа уйнай.

Бесәй.

Башҡортостан иленә

Имен килеп еттегеҙме?!

Һау ду ю ду! Һэлоу!

Әссәләмәғәләйкүм!

Исәнмесез, дусларым!

Хәйерле көн, Сысҡан Хан!

Ҡарһылыу, Бесәй Ханды етәкләп шыршы тирәләй йөрөтә.

Яңы йыл хужаһы – Хан,

Беҙ йырлайбыҙ һеҙгә дан,

Донъябыҙ булһын аҡтан,

Күңелдәребеҙ – пактан!

Йылдың башы уң булһын,

Теләктәр ҡабул булһын!

Ер шарында бар милләт

Берҙәм һәм татыу булһын,

Ерҙә тыныслыҡ булһын!

Сысҡан Хан. Рәхмәт! Спасибо! Ҫенкью! Жаҡсы! Хөрмәтле ҡунаҡтарым – Арыҫлан менән Мартаға Фольклориаданы асырға рөхсәт итәм!

Арыҫлан.

Рус һәм башҡорт юлда һәр саҡ юлдаш,

Табындаштар оло байрамда,

Яуҙа яуҙаш, дандаш һәм ҡәберҙәш

Изге һуғыш үткән майҙанда.

Марта.

Һин тәм бирҙең минең икмәгемә,

Һин тат бирҙең эскән һыуҙарға.

Ер йөҙөндә күпме халыҡ йәшәй, –

Туған иттең мине шуларға.

С Новым годом! Яңы йыл менән! Фольклориада йылын асыҡ тип иғлан итәм! (Башҡортостан Гимны яңғырай).

Бесәй.

Тыуған ерем – Урал иле,

Башҡортостан – бишегем.

Ниндәй халыҡ килһә лә,

Асыҡ минең ишегем.

Төклө аяғығыҙ менән, ҡунаҡтар!

Ҡыш бабай. Балалар, ҡунаҡтар, бөгөн беҙҙә ҙур байрам – төрлө илдәрҙән ҡунаҡтар килгән. Яңы йыл менән!

Ҡурайсылар – ҡурайҙа, ҡумыҙсылар ҡумыҙҙа уйнай, башҡорт ҡыҙы бейей.

Бесәй. Әйҙәгеҙ, һүҙҙе ҡунаҡтарға бирәйек.

Сысҡан Хан. Тәүҙә шиғырҙарыбыҙҙы һөйләмәйекме, диджей?

Бесәй. Әлбиттә, шулай!

Беҙ гөрләйбеҙ, йыр йырлайбыҙ

Бөтә ил менән!

Дуҫтарға бәхет теләйбеҙ,

Яңы йыл менән!

Беренсе бала.

Яңы йыл байрамы –

Тыуған илемдә.

Һөйләйем шиғырҙар

Туған телемдә.

Икенсе бала.

Башҡортостан – Тыуған илем,

Урал иле – төйәгем.

Ирәндектең ҡурайына

Тыпырлатып бейейем.

Ҡурай көйөнә шыршы тирәләй башҡортса бейеү башҡарыла.

Бесәй. Һүҙ ҡунаҡтарға бирелә. Рәхим итегеҙ, сибәр Украина ҡыҙы.

Украин ҡыҙы.

Украин халыҡ йыры.

Ой, чия це хатинка (хрестоматия для музыки, IV синыф, 118-се бит).

Ҡарһылыу. Туғандаш татар ҡыҙы, рәхим итегеҙ!

Марта. Пожалуйста!

Татар ҡыҙы татарса бейей.

Грузин халыҡ бейеүе көйө «Лезгинка» яңғырай. Бөтәһе лә бейергә төшә.

Бесәй. Ҡаҙаҡ туғаным, әйҙә, һеҙгә сират.

Думбыра көйө яңғырай. Төрлө милләт балалары концерт номерҙары башҡара.

Ҡыш бабай. Ер йөҙөндәге балалар матур бейей, йырлай, сәсәндәр ҙә икән үҙҙәре. Афариндар! Дуҫ булайыҡ!

Сысҡан. Диджей?

Бесәй (планшетын алып, WhatsApp-тағы Айыу олатайҙың СМС-ын уҡый). «Йомаҡ ҡойоу оҡшамаҫ, һәр милләттең көйөн яңғыратырһың, ҡайһы илдең көйө икәнен белһендәр».

Ҡарһылыу. Ярай, Айыу олатайҙың ҡушҡанын үтәйек. Диджей?

Бесәй. Фонограмма әҙер. (Төрлө көй­ҙәр яңғырай, илен атайҙар).

Япония, Греция, Молдавия, Па­кистан, Үзбәкстан...

Ҡыш бабай. Төрлө милли кейемдәр күҙҙең яуын ала. Гүйә, сәскәләр гөлләмәһе кеүек.

Ҡарһылыу. Иҫ киткес! Һуңғы һүҙ йыл хужаһы Сысҡан Ханға бирелә.

Сысҡан Хан. Барығыҙҙы ла Яңы йыл менән ҡотлайым! Минең йылым һеҙгә шатлыҡ-ҡыуаныстар ғына алып кил­һен, дуҫтар. Байрамды күңелле итеп үткәрәйек, бергәләп күңел асайыҡ.

Унан күмәкләп шыршы тирәләй йырлап өйрөләләр.

(«Әйлән-бәйлән». Роберт Миңнуллин һүҙҙәре, Фоат Әбүбәкеров көйө.)

– Һеҙ ҙә беҙгә ҡушылығыҙ,

Беҙ шатлыҡ таратабыҙ,

Тирә-яҡты яңғыратып,

Йырларға яратабыҙ.

Ҡушымта.

Әйлән-бәйлән, әйлән-бәйлән!

Беҙҙең менән, беҙҙең менән әйлән!

Йыр – ул ҡанат, йыр – ул байрам.

Беҙҙең менән, беҙҙең менән әйлән!

Йыр – ул ҡанат, йыр – ул байрам!

(Хрестоматия для музыки, IV синыф, 196-сы бит.)

Ҡыш бабай, Ҡарһылыу ҡунаҡтарҙы ҡурай, ҡумыҙ, башҡорт биҙәүестәре менән бүләкләй.

Бесәй. Ил башлығы Радий Фәрит улы Хәбиров ҡунаҡтарҙы Башҡорт­останыбыҙ буйлап сәйәхәткә саҡыра.

Бөтәһе бергә. Ур-р-ра! Яңы йыл менән! С Новым годом! З Новим роком!

Үзбәкстан, Тажикистан, Ҡаҙағстан, Ҡырғыҙстан, Төркмәнстан, Төркиә балалары. Хөрмәтле Башҡортостан балалары! Һеҙҙе буранайҙа мосолман илдәренә Яңы йылға – Наурузға саҡырабыҙ!

Башҡорт милли көйө яңғырай. Барыһы ла күмәкләп шыршы тирәләй бейей. Һәр төрлө уйындар, конкурстар дауам итә.


Зөһрә БӘШӘРОВА.
Әбйәлил районы, Теләш ауылы.
Читайте нас в