+12 °С
Ямғыр
Бөтә яңылыҡтар
Мәктәп сәхнәһе өсөн
11 Декабрь 2020, 12:53
Хуш киләһең, Үгеҙ йылы!
Ҡатнашалар: Ҡыш бабай. Ҡарһылыу. Йыл хужаһы – Үгеҙ быҙау – Йомабай. Иҫке йыл – Сысҡан хан. Бүре. Ҡуян. Бөтәһе лә битлек, бирсәткә кейгән, метр ярым алыҫлыҡта тора. Балалар менән ватсап аша аралашалар, сығыш яһайҙар.
Ҡыш бабай, Ҡарһылыу күренә. Бүре быҙауҙы баҫтыра.
Ҡыш бабай. Ох, һин! Батшаны? Ярамай!
Бүре (ирендәрен ялай). Һа! Ошомо? Унан Яңы йылға шашлыҡ ҡурам.
Йомабай (илай). Ә-з-ә-ә-әй... Э-э-э-э...
Ҡыш бабай (таяғын туҡылдатып).
Йылға хужа – Йомабай,
Йомала ул тыуған, бай.
Әлегә ул мөгөҙһөҙ,
Сыҡһа мөгөҙсөктәре,
Үсегер, үсекләшер,
Тәгәрәтер, һөҙөшөр.
Йомабай.
Алып киләмен байлыҡ,
Байлыҡ түгел бер айлыҡ,
Һау булһаҡ, булыр байлыҡ,
Иң ҙур байлыҡ – ул һаулыҡ.
Хуш булып тор, Сысҡан йыл,
Һаумы, һаумы, Яңы йыл!
Сысҡан хан инә.
Сысҡан хан (шыршы тирәләй ҡыңғырауҙы ҡыңғыратып, Йомабайға килә).
Зыңғыр, зыңғыр, эй, зыңғыр...
Минән ҡыңғырау – бүләк,
Йыш ҡыңғыратып тор,
Әҙәмде иҫкәртеп тор:
Юҡ-бар ҡапмаһын бер ҙә,
Боҙом төшмәһен ергә,
Юл асылыр юҡ сиргә,
Ҡабатлама хатамды,
Ауырытма халҡымды!
Йомабай ҡапыл ғына Сысҡан хандың башынан тажын тартып ала.
Йомабай.
Был – ҡотһоҙ ауырыу таж,
Көсөм етмәй – ауыр таш.
Кеймәйем мин был тажды,
Һелтәп онтайым ташты.
Ауырыу таж! Ер шары ауырый!
Таж-таш онтала, селпәрәмә килә.
Йомабай (ҡыңғырауын шылтыратып, шыршыны урай). Ур-р-ра! Таж вирустан ҡотолдоҡ!
Ҡул сабалар. Сысҡан хан шым ғына сыға.
Ҡыш бабай, Ҡарһылыу (бергә).
Ҡыңғырат, еҙ ҡыңғырау,
Саң ҡаҡ тирә-яҡтарға,
Яңғыра алыҫтарға,
Ялҡынлы сәләмемде
Ишеттерсе дуҫтарға!
Ҡыш бабай, Ҡарһылыу, Бүре, Йомабай (ҡулдарын ауыҙға ҡуйып).
Выжжжж, выжжжж...
Тиҙерәк, әсе елдәр,
Ҡыуығыҙ вирустарҙы!
Тиҙерәк, Селлә бабай,
Туңдыр, һин, вирустарҙы!
Сыҡ әйҙә, Ҡояш апай,
Ҡайнар нурҙарың менән
Иретсе вирустарҙы!
Яман сырхау юҡ булһын,
Ер шарыбыҙ һау булһын,
Ҡот ҡайтһын илебеҙгә,
Йәшәргә еребеҙҙә!
Йомабай ҡапыл туҡтай. Бармаҡтарын ҡарай, кеҫәләрен ҡапшай, муйынын һәрмәй, башын тотоп сайҡай.
Бүре. Ни булды, безәүкәй?
Йомабай. Йөҙөгөм? (Үҙе ҡулдарын йәйә, телефондан шылтырата). Әсәй, йөҙөгөм өйҙә күренмәйме? Көшәлегемде ҡара әле.
Бүре (башын тотоп сайҡай). Уай-уай-уай... Ҡолағыңда бер нәмә ялтырай... Эй! Танауыңда ине түгелме?
Йомабай. Эйе, эйе. Онотҡанмын.
Бүре. Әллә бөтөнләйгә юҡ инеме? Мөгөҙөң менән бутайһыңмы? (Мөгөҙҙәрен һәрмәй, ҡапыл быҙау уны баҫтыра башлай ҙа мөйөшкә ҡыҫтап һөҙөргә тотона). Вәт, әй! Ошоларға биреш инде!
Ҡыш бабай. Бәләкәстең мөгөҙҙәре сыға.
Ҡарһылыу. Ҡытығы килә.
Бүре. Ә, шулаймы? Кил әле, бәләкәсем. (Быҙау янына килә, уныһы уға башын ҡуя, уны тырнай). Ииии, бәпес кенә бит әле. Киләһе йылға (ҡулдары менән күрһәтә) бынауындай йоп-йомро үгеҙ булыр, эйеме? (Йомабай дөрөҫләп, башын һелкә). Маладис! Гел минән башыңды тырнатып тор, яраймы. (Ҡулдары менән башына ҡуйып күрһәтә). Ө-ө-өлкән. Мышыныҡы кеүек мөгөҙ үҫер.
Йомабай (башын ҡуя). Һәнәк кеүек осло булһын! (Баҫтыра).
Бүре. Иҫемдә. Танауыңда күргәйнем.
Ҡуян йүгереп инә, ҡулдарын шыйыҡса менән эшкәртә, битлеген, бирсәткәләрен кейә. Йомабай бармағы менән төртөп күрһәтә лә шарҡылдап көлә башлай.
Йомабай. Әстә. Төлкө тиһәң, төлкө түгел. Ҡуян тиһәң, аяҡтары оҙон. Кем ул?
Ҡуян (илай). Урманда берәү ҙә күренмәй. Бөтәһе лә таж вирустан ҡурҡа. Терпе лә энәһен бирмәй. Яңы йылға костюм да тегә алманы-ы-ым...
Ҡыш бабай.
Төлкөнөң тунын кейеп,
Төрлөсә баҫып, бейеп,
Байрамға килгән Ҡуян,
Алдан иҫкәртеп ҡуям:
Ҡулың ҡысыһа, Бүре,
Ботоңдан аҫып ҡуям!
Бүре (гитарала уйнап, йырлай).
Юҡҡа ғына ҡайғырма,
Ҡасмаҫ ҡуяның минән.
Ҡайтыр ул урманына,
Инер ул ҡуйыныма,
Шашлыҡ ҡурырмын унан...
Эй, тәмле булыр шашлыҡ,
Түләрҙәр бишәр меңлек.
Иха-ха-ха ла уха-ха-ха
Уха-ха-ха ла иха-ха... (Эсен тырнап көлә, Ҡуянды ҡолағынан тотмаҡсы).
Ҡыш бабай. Ярамай!
Ҡарһылыу. Эйе шул. Бүре менән Ҡуян, Төлкө менән Әтәс, Эт менән Бесәй... Их, ҡасан бергә уйнарҙар икән. Ярамай шул! Таж вирус йоға. (Ҡулъяулығы менән күҙҙәрен һөртә).
Йомабай. Йөҙөктө кейеп, теләктәр теләһәм, таж вирус юғалыр ине. Һы-ы-ы-ы-ы...
Бүре (телефонын ала). Бурһыҡҡа шылтыратам. Ул көсөк һымаҡ. Бар нәмәне өйөнә ташый. Унда юҡ нәмәнең үҙе юҡ. Алло!
Йомабай. Бурһыҡтыҡы кәрәкмәй!
Ҡарһылыу. Шылтыратма, зинһар! Сабып килер ҙә етер (шыршынан бәләкәс кенә тубырсыҡ алып, Йомабайға тәгәрәтә).
Бүре. Миңә бир!
Йомабай. Улайһа, бейеп күрһәт.
Бүре шыршы тирәләй бейергә төшә, үҙе нимәлер тип ҡысҡыра, һыҙғыра. Ҡапыл шыршы төбөнән ниҙер ала, тубырсыҡты ташлай.
Бүре. Ур-ра! Йөҙөк миндә!
Бөтәһе. Ур-р-ра! Таж вирусты ҡоротабыҙ!
Ҡыш бабай. Хужаһына бирәйек.
Бүре (йөҙөккә шыбырлай). Эх, вирустар таждарын ташлаһын ине. (Ҡысҡырып). Эй, шиғыр ҙа тыңлап булманы.
Ҡуян. Шағир түгелмен. Мин ни – рэппер, беләһегеҙ. (Шыршы тирәләй һикереп йөрөп һамаҡлай).
Өйрөлтәм ҡойроғом,
Ҡыбырла, ҡолағым,
Уйнатам күҙҙәрем,
Бейетәм үҙҙәрен,
Тыумаһын ҡомаҡ йыл,
Тыуһын өр-яңы йыл.
Мәктәптә уҡыйыҡ,
Баҡсала уйнайыҡ,
Сәйәхәт ҡылайыҡ,
Вирустарҙы ҡыуайыҡ,
Еребеҙҙе һаҡлайыҡ.
Реклама. Таж вирустан күҙҙәрегеҙҙе һаҡлағыҙ! Ҡуянтубыҡ кимерегеҙ. А витамины күп.
Бүре. Йомаҡ та ҡоймайҙар.
Ҡарһылыу. Ватсапҡа яҙмағандармы икән? Яҙғандар. Әйҙәгеҙ, кем яуабын табыр?
1. Йоҡосо бабайға буран
Ҡарҙан буралар бурай.
Яңы йылға бараһың, тип
Уның төштәрен юрай.
(Айыу).
2. Ялан буйлап сап ыжғыр,
Тешең һынғансы һыҙғыр!
(Буран).
3. Йәшел күлдәген кейеп,
Килгән беҙгә ҡунаҡҡа.
Йырлата ла уйната,
Бейетә лә таҡмаҡҡа.
(Шыршы).
4. Ташлайым элгесемде,
Элерһең кәпәсеңде.
(Мышы).
5. Көндөҙ – йоҡосо,
Төнөн – һунарсы.
(Өкө).
6. Ике ағай йәнәш бара, бер-береһен уҙа бара.
(Саңғы).
7. Иҫкермәй торған йыл.
(Яңы йыл).
8. Һоро, бүре түгел,
Оҙонғолаҡ, ҡуян түгел,
Тояҡлы, ат түгел.
(Ишәк).
9. Шыйыҡ, һыу түгел,
Аҡ, ҡар түгел.
(Һөт).
Бүре. Эх, ҡайҙа дуҫтар! Һағындым. Йомабай, мә, йөҙөгөң. (Йөҙөктө быҙауға бирә).
Ҡыш бабай. Ҡайһы еренә ҡуйһын?
Бүре. Моронона таҡһа, үәт, хәтәр була!
Йомабай. Аңланым. Әйҙәгеҙ, теләктәр теләйек.
Күмәкләп.
Булайыҡ һәр саҡ өйҙә,
Тышҡа сыҡмайыҡ бер ҙә.
Вирус тапмаһын беҙҙе,
Ерҙә ҡалмаһын эҙе!
Йомабай.
Киләһе йыл күмәкләшеп
Ҡаршылайыҡ Яңы йылды,
Йәшел шыршы төбөндә,
Яңы йыл тыуған көндә.
Ҡарһылыу.
Таҙартайыҡ Ер шарын,
Тотайыҡ һаҡлап ҡына.
Бүре, Ҡуян.
Ҡоротайыҡ вирусты,
Йәшәйек йырлап ҡына.
Ҡыш бабай.
Өйрәнегеҙ, ғалимдар,
Вирустарҙың таждарын.
Ҡоротоғоҙ, ғалимдар,
Вирустарҙың баштарын!
Йомабай.
Ташлайыҡ битлектәрҙе,
Эрзинкә бирсәткәне.
Яңы йыл килһен беҙгә –
Тыныс, сәләмәт илгә!
Бөтәһе бергә. Яңы йыл менән!
Зөһрә БӘШӘРОВА.
Әбйәлил районы, Теләш ауылы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж