+12 °С
Ямғыр
Бөтә яңылыҡтар
Матбуғат
24 Ноябрь 2017, 15:50
Мораҡта – матбуғат байрамы
Бәләкәйҙән балаларыбыҙҙа туған телебеҙгә һөйөү тәрбиәләйек, гәзит-журналдарҙы яҙҙырайыҡ. Телебеҙ бар икән, халҡыбыҙ ҙа, илебеҙ ҙә йәшәр. Милли матбуғат – күңелдәрҙе рухи яҡтан байытыусы ла, халҡыбыҙҙы берләштереп, бар итеүсе лә ул.
Күгәрсен ағинәйҙәре.
Мораҡ ауылында үткән «Әйтер һүҙем бар халҡыма» тип аталған милли матбуғат байрамында һүҙ ана шул көнүҙәк тел мәсьәләһе, гәзит-журналдарға яҙылыу хаҡында барҙы. Унда «Мораҙым», «Йәншишмә», «Йәшлек», «Киске Өфө» гәзиттәре, «Аҡбуҙат», «Аманат», «Башҡортостан ҡыҙы», «Шоңҡар», «Ағиҙел» журналдары вәкилдәре телмәр тотто. Сәхнә түрен дәртле йыр-бейеүҙәр ҙә биҙәне.
Был сараға төрлө ауылдарҙан китапханасылар, уҡытыусылар, матбуғат тормошона битараф булмаған кешеләр килгәйне. Милли кейемдәр кейеп, күкрәксәләр тағып, Мәҡсүт, Волостновка ауыл советы ағинәйҙәре лә ситтә ҡалманы. Улар үҙҙәренең ҡул эштәре, халҡыбыҙҙың милли ризыҡтарынан торған матур күргәҙмә лә тәҡдим итте. Балалар ижады йортонда шөғөлләнеүсе уҡыусыларҙың бәйләгән уйынсыҡтары ла бик һоҡланғыс ине!
Әлиә менән Лилиә бөтәһенә лә өлгөрә
Матбуғат байрамында гәзитебеҙ ойошторған «Мәктәбем ғорурлығы» конкурсы еңеүселәре – Мораҡ башҡорт гимназияһы уҡыусылары Әлиә Моталлапова менән Лилиә Абдуллинаны ла ихлас ҡотланыҡ. Улар уҡыуҙа ғына түгел, спорт буйынса ла шәптәр икән. Әлиә, мәҫәлән, баскетбол, футбол, волейбол уйнау менән мауыға, район кимәлендә призлы урындар ҙа яулай. Ҡыҙҙың бейеү, йырлау, яҙыуға ла әүәҫлеге барлығын белдек. Ижади эштәрен башҡорт теле һәм әҙәбиәте уҡытыусыһы Зилә Мәхмүт ҡыҙы Псәнчина тикшереп, файҙалы кәңәштәрен биреп тора. Синыфташы Лилиә лә тырышлығы, уңғанлығы менән алдыра. Баскетбол ярыштарында ҡатнашмай ҡалмай. Инде район кимәлендә һынатмаҫҡа иҫәбе. Тарих, йәмғиәтте өйрәнеү фәндәрен бигерәк тә яратып өйрәнә.
– Интернатта бер ғаилә булып йәшәйбеҙ. Тормош-көнкүрешебеҙҙе лә үҙебеҙ ойошторабыҙ. Шул йәһәттән беҙҙә интернат советы эшләп килә. Таҙалыҡ, хеҙмәт, спорт комиссиялары, мәҙәниәт секторы бар. Уларҙың һәр береһенә куратор итеп бер тәрбиәсе беркетелгән. Был ҡыҙҙар спорт комиссияһының әүҙем ағзалары булып тора. Интернат советы ултырыштарын да ҡалдырмайҙар, – ти улар хаҡында тәрбиәселәре Гүзәл Зәйнәғәбдин ҡыҙы Кинйәбаева.
Әйткәндәй, ҡыҙҙар уҡыған белем усағында балаларҙа туған телгә һөйөү уятыу йәһәтенән күп эштәр башҡарыла. Шәжәрә байрамы нәҫел-нәсәбен барларға ярҙам итһә, йолаға әйләнгән «Гимназия һылыуҡайы», «Интернат һылыуҡайы», «Ҡыпсаҡ батыры» конкурстары милли үҙаңды үҫтерергә ярҙам итә. Милли көрәш, уҡ атыу буйынса ярыштар ҙа матур йолаларыбыҙға һөйөү тәрбиәләй. Башҡорт теле һәм әҙәбиәте уҡытыусыһы, район башҡорттары ҡоролтайы башҡарма комитеты рәйесе Гөлфиә Хәсән ҡыҙы Искәндәрова әйтеүенсә, йыл һайын «Урал батыр»ҙы яттан һөйләүселәр бәйгеһендә ҡатнашып, төбәк, республика кимәлендә лә гел генә призлы урын алалар. Фәнни-ғәмәли конференцияларҙа ла һынатҡандары юҡ.
Бына шундай шәп ҡыҙҙар менән дә таныштыҡ матбуғат байрамында.
Гәзит уҡыусыларыбыҙ ҙа Күгәрсен районында күберәк булһын ине.
Гөлназ ШӘЙХЕТДИНОВА.
Күгәрсен районы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж