Журналистар тәжрибә уртаҡлашты

Республика, район, ҡала гәзит-журналдары, радио, телевидение һәм интернет-баҫма хеҙмәткәрҙәре иҫ киткес матур, ҡояшлы көндә “Йондоҙло” ял базаһында осрашты.

«Журфест»ҡа Рәсәйҙең башҡа төбәктәренән дә ҡунаҡтар килгәйне. Ҡатнашыусылар өсөн белем биреү, мәҙәни һәм спорт программалары ойошторолдо. Иң алдынғы журналистар бүләкләнде.

Журналистика бер урында тормай. Хәҙер интервью ала һәм репортаждар яҙа белеү генә етмәй. Заманса мәғлүмәт технологиялары журналистарҙан ваҡыт менән бергә атлауҙы талап итә. Шуға ла федераль белгестәр үткәргән оҫталыҡ дәрестәре файҙалы булды. Мәҫәлән, “Ruptly” видеоагентлығының урыҫ телле телеграм-каналы етәксеһе Виктория Иванованың сығышын ҡыҙыҡһынып тыңланыҡ. Телеграм әлегә беҙҙең өсөн – тулыһынса асылып бөтмәгән майҙансыҡ. Спикер социаль селтәрҙә контентты үҫтереү буйынса үҙ серҙәре менән уртаҡлашты.

Киң мәғлүмәт сараларында шулай уҡ яһалма интеллект ҡулланыу ҙа көнүҙәк тема булып тора. Был хаҡта Рәсәй Федерацияһының Журналистар Союзы сәркәтибе Роман Серебряный һөйләне.

Матбуғат хеҙмәткәрҙәре күңел асыу программаһында ҡатнашырға ла өлгөрҙө: квест, спорт уйындары һөҙөмтәләре буйынса еңеүселәрҙе грамоталар менән бүләкләнеләр.

Һатыу, күргәҙмә лә эшләне. Район-ара ижади берләшмәләр вәкилдәре үҙҙәренең стендтарын тәҡдим итте.

Фестивалде йомғаҡлап, Башҡортостан Республикаһы Журналистар союзы менән Кубань Журналистар Союзы килешеүгә ҡул ҡуйҙы.

Журналистар өсөн ойошторолған иң ҙур сара республикала инде 13-сө тапҡыр үткәрелде. Йыл һайын киң мәғлүмәт саралары вәкилдәре көнүҙәк мәсьәләләрҙе тикшереп, республикабыҙҙың иң матур мөйөштәрендә ял итеп, тәжрибә уртаҡлашып ҡайта.

Автор фотолары.