Хөрмәтле ҡунаҡ кеүек ҡаршыланылар

Тау­ҙың башында сәксәк ашатып, ҡымыҙ эсерҙеләр. Һуңынан концерт ҡарарға барҙыҡ. Ул бик матур ойошторолғайны. Дәртле итеп бейенеләр ҙә, моңло итеп йырланылар ҙа...
Ҡоролған күркәм тирмәләр­ҙе ҡараныҡ. Әсәйем кешеләр­ҙән Шәмсинур инәй ҡайҙа йәшәгәнен һорашҡас, улар: «Электр урамында, әле үҙе анау иң остағы тирмәлә ағинәйҙәр менән йөрөп ята ине», – тине. Шунда киттек. Унда ла инәйҙе осрата алманыҡ. Яңы ғына өйөнә ҡайтып киткән икән. Кешеләрҙән һораша-һораша, инәйҙең йәшәгән йортон эҙләп таптыҡ.
Бик ихлас ҡаршы алды ул. Беҙгә тәмле итеп сәй эсерҙе. Һуңынан әсәйгә үҙенең бәләкәй саҡта күргәндәрен, һуғыш ва­ҡытындағы ауыл тормошо тура­һында һөйләне. Әсәйем бары­һын да яҙып алды. Әле Шәмсинур инәйгә – 87 йәш, шулай булһа ла, хәтере шәп. Бергәләп иҫтәлеккә фотоға ла төштөк.
Кис еткәс, Әбделкәримдәге өләсәйемдәргә юл тоттоҡ. Унда ял итеп алғас, ҡайтырға уйлағайныҡ, ҡот осҡос йәшен башлан­маһынмы! Йоҡларға ҡалдыҡ. Иртәгеһенә өмә булды. Әсәй, Әлфиә инәй, Ын­йыҡай апай, Наил олатай тәҙрә буяны.
Ҡайтышлай Баймаҡтан ҡаҙ бәпкәләре һатып алдыҡ. Бигерәк матурҡайҙар үҙҙәре! Улар хәҙер ҙурайып та китте инде.

Кәримә АҠМАНОВА, I «В» синыфы уҡыусыһы.
Сибай ҡалаһы, Рамаҙан Өмөтбаев исемендәге башҡорт лицейы