Беренсе июндән гимназиябыҙҙа «Йәйләү» көндөҙгө ял лагерында ял иттем. Унда беҙ төрлө саралар, байрамдар, ярыштар үткәрҙек. Рәхәтләнеп уйнап-көлөп, һаулығыбыҙҙы нығыттыҡ.
Шулай уҡ Өфө ҡалаһында «Аврора» таланттар үҫтереү үҙәгендә булдым. Унда беҙ төрлө тәжрибәләр үткәрергә барҙыҡ. Миңә микроскоптан ҡарап бер күҙәнәклеләрҙе эҙләү оҡшаны.
Ғаиләбеҙ менән Ғафури районындағы дөйәғош фермаһында, Стәрлетамаҡ ҡалаһындағы Юрий Гагарин исемендәге паркта булдыҡ.
Август айында Өфө ҡалаһына барҙыҡ. Аквапаркта ял иттек. «Ҡашҡаҙан» паркындағы йырсы фонтандарын күреп, һоҡландыҡ. Ағиҙел буйлап теплоходта йөрөнөм.
Өйҙә лә тик ятманым. Атай-әсәйемә баҡса, йорт эштәрендә ярҙамлаштым.
Бына шулай каникулым үтте лә китте. Ошо матур хәтирәләрем ҡышҡы һыуыҡ көндәрҙә күңелемде йылытып торор әле.
Әлиә ҒӘЛИЕВА.
Ауырғазы районы,
Талбазы башҡорт гимназияһы.