«Тимербатыр»ҙа беҙ ял итеп кенә ҡалманыҡ, робот техникаһы менән дә шөғөлләндек. Ныҡ күңелле булды!
Роботтарҙы лего конструкторынан, тимер сымдарҙан һәм моторҙар ҡуйып эшләнек. Иң ҡыҙығы – беҙ уларҙы махсус программа ярҙамында хәрәкәтләндерергә, йөрөтөргә өйрәндек.
Проекттар әҙер булғас, «Робоһабантуй» тигән байрам үткәрҙек. Унда роботтар ысын кешеләр һымаҡ ярышты – бау тартышты, бер-береһен этеп көрәште. Иң көслө һәм етеҙ робот яһаусылар еңеүсе булып танылды.
Был йәйге мәктәптә тәрбиәселәр беҙҙе көн һайын төрлө экскурсияларға ла йөрөттө. Бер аҙна эсендә Башҡортостан дәүләт тәбиғи ҡурсаулығында, «Шүлгәнташ» мәмерйәһендә һәм уның эргәһендәге ҙур яңы музейҙа, Әбделмәмбәт янындағы мәмерйәлә булырға өлгөрҙөк.
Ауылдың ағинәйҙәре менән дә таныштыҡ. Улар бик күп халыҡ йырҙарын, әкиәттәр, таҡмаҡтар белә икән. Беҙгә «Йәшерәм яулыҡ», «Ҡырҡ таш» тигән уйындарҙы өйрәттеләр.
Милли йәйәнән уҡ атырға, һыбай йөрөргә, лазерлы станокта сувенирҙар эшләргә, балсыҡтан көршәк яһарға... «Тимербатыр»ҙа күп нәмәгә өйрәндек беҙ. Бергәләп башҡортса йырланыҡ, бейенек.
Йәйге мәктәптән ҡайтырға сыҡҡас, бер аҙ ҡыйын булып торҙо. Бер аҙна аҙ икән. Икенсе йыл бер юлы ике сменала ял итергә кәрәк, тип уйлап ҡуйҙыҡ әле.
Сәлимә һәм Нурсолтан ХӘСӘНОВтар.
Өфө ҡалаһы, 82-се гимназия.