Йәйге хәтирәләр – фотоһүрәттәрҙә

Йәй – күңелле мәл, әммә тиҙ уҙа шул. Минең каникулым да «һә» тигәнсе үтеп тә китте. Йылы хәтирәләр булып телефон тулы сағыу фотоһүрәттәр генә ҡалды. Мин уларҙан күңел йылытыусы, оҙон ҡышта тырышып белем алырға әйҙәүсе шәхси фотогалерея эшләп ҡуйырға булдым. Интернет селтәрендә матур идеяға тап булдым һәм уны тормошҡа ашырҙым.
Тимер сымдан эшләнгән канваға декоратив ҡыҫтырғыстар ярҙамында фотоһүрәттәр теҙҙем. Кисен тағы ла күркәмерәк булып янып торһон өсөн төҫлө гирляндалар өҫтәнем. Был галереяны яңыртып торорға, хатта девиз, афоризмдар менән тулыландырырға мөмкин. Тағы ла төрлө иҫкәрмәләр ҡуйыу өсөн уңайлы.
Йәй йылыһы бөрккән шәхси мөйөшөм миңә яңы уҡыу йылын уңышлы үтергә ярҙам итер, тип ышанам. Һеҙ ҙә эшләп ҡарағыҙ, креатив идеяларығыҙ менән бүлешегеҙ!

Зөлхизә ИСҠУЖИНА, йәш хәбәрсе.
Хәйбулла районы,
Аҡъяр ауылындағы 3-сө күп профилле полилингваль мәктәп.