Бер осрашыр өсөн килдек беҙ.
Аҡ ҡалпағым төшөрҙөм ҡулдан,
Беҙҙең дуҫ-иш менән ил тулған…
ЙЫРҘА шулай 70 саҡрым яҡын ер түгел, тип йырланһа ла, беҙгә 300 саҡрым алыҫлыҡта ятҡан Әбделмәмбәт ауылына барып, көнөндә кире әйләнеп ҡайтыу ҙа бер ни түгел. Эйе, заманалар ҙа икенсе шул хәҙер. Еңел автомобилдә үткән тигеҙ, матур юлдарҙы элекке ваҡыттағыһы менән сағыштырып булмай инде. Ә Әбделмәмбәт мәктәбе уҡыусылары менән осрашыуға иһә беҙ айырыуса ашҡынып барабыҙ.
Был юлы унда республика матбуғат баҫмалары вәкилдәре ҡатнашлығында «Рух һандалы. Милләт тотҡаһы» тигән әсәйҙәр конференцияһы уҙҙы. Матур сараға «Йәншишмә», «Йәшлек», «Башҡортостан», «Киске Өфө», «Таң» гәзиттәре, «Аҡбуҙат», «Шоңҡар» журналдары хеҙмәткәрҙәре, ауыл ағинәйҙәре, уҡыусылар, уҡытыусылар, атай-әсәйҙәр йыйылды.
Аҙаҡтан төрлө синыфтарҙа асыҡ дәрестәр үтте. Беҙ өсөнсөләр һәм дүртенселәр менән булдыҡ. Уҡытыусы Земфира Ғәлимйән ҡыҙы Ғөбәйҙуллина «Ғаиләм – минең байлығым» темаһына балалар менән ғаилә ҡиммәттәре хаҡында бик матур синыф сәғәте үткәргәндән һуң ҡыҙҙар, малайҙар менән күҙгә-күҙ ҡарап һөйләшеү бәхете тейҙе. Әлбиттә, һүҙ күберәк «Йәншишмә» тураһында барҙы. Балаларҙың гәзиттең йөкмәткеһе менән таныш булыуы һөйөндөрҙө. Синыфтары менән яҙылған саҡтары ла булған икән. Әүҙемлектәренә хайран ҡалырлыҡ. Һорауҙарҙы ла яуҙырҙылар ғына. Яуап биреп кенә өлгөр. Айырыуса Алина Мәхмүтова, Фирзәлиә Ҡарамышевалар һоҡландырҙы. Фирзәлиә шиғырын да һөйләне, йырланы ла. «Йәншишмә»лә хәбәрҙәре лә баҫылғаны бар. Айгөл Сөләймәноваға алмаш үҫә, былай булғас. Афарин! Башҡалар ҙа үҙҙәренең һәләтен күрһәтте. Бигерәк шәптәр инде. Һуңынан бәләкәстәр иншаларын, шиғырҙарын, һүрәттәрен йыйып бирҙе. Киләсәктә улар «Йәншишмә» биттәрендә донъя күрер әле.
ШИҒЫРҘАР ижад иткән, һүҙ ҡәҙерен белгән балалар бик күп икән бында. Байрамдың әҙәби-музыкаль өлөшөндә ҡыҙҙар һәм малайҙар үҙҙәренең шиғырҙарын уҡып ишеттерҙе, китапсыҡтарын килгән ҡунаҡтарға бүләк итте. Йырға-бейеүгә лә шәптәр. Рәхәтләнеп, һоҡланып ҡараныҡ. Ауыл ағинәйҙәренең сығышы ла байрамға йәм генә өҫтәне.
Республика милли баҫмаларынан килгән ҡунаҡтар тел ҡәҙере, милләт ҡиммәттәре тураһында һөйләне, үҙҙәре эшләгән гәзит-журналдар менән таныштырҙы.
Бындай һөйләшеүҙәр ике яҡ өсөн дә файҙалы булды. Беҙ иһә редакция өсөн әллә күпме материалдар туплап, матур тәьҫораттар менән ҡайттыҡ. Бөрйән ерендә ҡабаттан осрашҡанға тиклем!
Хәлиҙә ЧЕМБАРИСОВА.
Бөрйән районы.