Белем усағында балалар һаны бигүк күп түгел, Йомағужа башланғыс мәктәбе һәм Илкәнәй балалар баҡсаһындағылар менән бергә 72 бала. Шулай булыуға ҡарамаҫтан, төрлө бәйгеләрҙә әүҙем ҡатнашып, призлы урындар яулап торалар. «Башҡортостан ынйылары» конкурсында гел генә уңышҡа ирешәләр. Быйыл башҡорт теленән интернет-олимпиадала 6 уҡыусының барыһы ла I, II, III урындар яулаған. Уҡыу йорттарына инеү кимәле лә юғары. Мәскәү, Санкт-Петербург ҡалаларында ҡаҙна урындарында уҡыған сығарылыш синыф уҡыусылары ла бар. «Улар – беҙҙең мәктәп ғорурлығы», – ти директорҙың тәрбиә эштәре буйынса урынбаҫары, башҡорт теле һәм әҙәбиәте уҡытыусыһы Гөлдәр Шәфҡәт ҡыҙы Шәмсетдинова. Бында йыр-моң, бейеүгә һәләтле, шиғыр яҙыусы ҡыҙҙар һәм малайҙарҙың байтаҡ булыуы ла ҡыуандырҙы.
Төплө белем биргән, үҙҙәренең эштәрен яратҡан уҡытыусылар тураһында ла телгә алып китмәйенсә булмай. Раян Рамаҙан улы Араптанов, Әлфиә Әхмәҙулла ҡыҙы Аҙнабаева, Гөлдәр Шәфҡәт ҡыҙы Шәмсетдинова, Гөлфиә Руслан ҡыҙы Ҡасимова, Зөһрә Сабир ҡыҙы һәм Рәмилә Хисмәт ҡыҙы Мөхәмәтшиналар, башланғыс синыфтарҙа Айгөл Раһип ҡыҙы Хөсәйенова, Әҡлимә Айрат ҡыҙы Вилданова уҡытыуға бар күңелдәрен һала.
Ҡыуаныслы яңылыҡтарҙан спорт залдары төҙөкләндерелә башлаған, иҙәндәре алыштырыла, рәшәткәләр ҡуйыла. Спорт секциялары булмаһа ла, районда уҙған ярыш, турнирҙарға белем усағы директоры, физкультура уҡытыусыһы Раян Рамаҙан улы Араптанов үҙе әҙерләүен дә белдек. Ҡыҙҙар, малайҙар драма театры, шахмат түңәрәктәрендә лә әүҙем шөғөлләнә.
Ә осрашыу тамаша залында үтте. Унда ингәс үк уҡыусыларҙың ҡул эштәренән, һүрәттәренән торған күргәҙмә иғтибарыбыҙҙы йәлеп итте. Ниндәй генә әйберҙәр ҡуйылмағайны! Һай, афариндар, бигерәк оҫталар икән үҙҙәре. Залға йыйылыусылар баш мөхәрриребеҙ Мирсәйет Ғүмәр улы Юнысовтың телмәрен иғтибар менән тыңланы.
– «Йәншишмә» – беҙҙең өйҙә яратҡан гәзит. Унда һеҙҙең кеүек уҡыусылар яҙыша, иң әүҙемдәренә «Йәш хәбәрсе» тигән исем бирелә. Ул – шул хәтлем йөкмәткеле баҫма. Кроссворды ла бар, төрлө конкурстар ҙа үткәрелә. Үҙегеҙҙең телегеҙҙе яҡшы белер өсөн башҡортса сыҡҡан балалар һәм үҫмерҙәр баҫмалары менән дуҫ булырға тейешһегеҙ. Беҙ уҡымайбыҙ икән, гәзит ябыласаҡ, – тип урыҫ теле һәм әҙәбиәте уҡытыусыһы, элекке белем усағы директоры Зөһрә Сабир ҡыҙы «Йәншишмә»не алдырырға саҡырҙы.
Ул үҙе мәктәп йылдарында «Башҡортостан пионеры»н (әле «Йәншишмә») уҡып үҫһә, әле мәктәптә 34 йыл эшләү дәүерендә гәзиткә яҙылмай ҡалғаны юҡ. Ейәне лә яратып уҡый.
Осрашыу аҙағында башланғыс синыфтарҙың барыһы ла уҡытыусылары Әҡлимә Айрат ҡыҙы Вилданова, Айгөл Раһип ҡыҙы Хөсәйенова менән бергәләп гәзиткә яҙылырға теләүҙәрен белдерҙе. Бигүк күп булмаһалар ҙа, беҙҙең өсөн ҡыуаныс инде. I – IV синыфтар интернет-олимпиадаларҙа ла әүҙем ҡатнаша, һүрәт төшөрөргә, йырларға, бейергә әүәҫтәр икән. Мәктәптә уҙған бер саранан да ситтә ҡалғандары юҡ. Уҡыуҙары ла һәйбәт, Наҙгөл Исҡужина, Ислам Сәфәров, Айҙар Мөхәмәтшин, Зилә Ардивановалар тик «бишле» билдәләренә генә өлгәшә.
Яңы уҡыу йылын илкәнәйҙәр өлгө күрһәтеп башланы. Тағы кемдәр дауам итер икән? Ә һеҙ «Йәншишмә»гә яҙылдығыҙмы? Редакция үткәргән уйындарҙа, бәйгеләрҙә лә ҡатнашығыҙ. Матур-матур бүләктәр күптән әҙерләнгән. Әйҙәгеҙ, әүҙемерәк булайыҡ!
Гөлназ ШӘЙХЕТДИНОВА.
Көйөргәҙе районы.