Бәйге географияһы киң генә: республиканың 25 районынан һәм 3 ҡалаһынан 70 бала эшен ебәргән. Өс номинацияла ҡатнашырға мөмкин ине. “Ушинский әкиәттәренең тылсымлы аҡылы” тип аталғанына инша, эссе, хикәйәләр ҡабул ителде. “Яҙыусының бала саҡ донъяһы”нда буктрейлерҙар ярышты. Ә “Хазина” номинацияһына Константин Дмитриевич әкиәттәре буйынса тактиль китаптар тәҡдим итте уҡыусылар.
– Изге һәм кәрәкле эш башҡарыла. Бала бит ҡамыр кеүек: нисек әүәләйһең, шулай килеп сыға. Ошо бәйге лә уҡыуға һәм ижадҡа һөйөү тәрбиәләй, – тине жюри ағзаһы, “Аҡбуҙат” журналының баш мөхәррире Лариса Абдуллина.
Һәр номинацияла бер нисә урын билдәләнде. Еңеүселәр араһында 63-сө интернат-мәктәп тәрбиәләнеүселәре – Ринат Хәсәнов, Радмир Абдуллин, Елизавета Ломакина ла бар. Етәкселәре – Өфөнөң 30-сы моделле китапхана хеҙмәткәрҙәре Елена Кәримова менән Оксана Шаркаева. Үҫмерҙәр унда яңы әҫәрҙәр менән танышырға ихлас йөрөй. Бергәләп бер нисә ай эшләгәндәр тактиль китапты. Әкиәттәрҙе Брайль шрифты ярҙамында уҡырға була.
Ошо уҡ номинацияла лауреат исеме алған Туймазы ҡыҙы Карина Солтанова бүләкләү тантанаһына килә алмаған. ДЦП диагнозлы үҫмер өйҙә генә белем ала.
– Хәтере яҡшы булғас, гел шиғыр һөйләү ярыштарында ҡатнаша инек. Ҡул эшенә тәүге тапҡыр тотоноуыбыҙ. Баш ҡалаға саҡырыу алғас, аптырап киттек. Китабыбыҙ юғары баһаланыр тип көтмәгәйнек, – ти әсәһе Ләйсән Фәрит ҡыҙы.
Конкурс эштәренән буктрейлер өҙөктәрен ҡарау, сәсмә әҫәр өлгөләрен тыңлау насип булды. Ә китаптар күргәҙмәгә ҡуйылғайны. Ҡайһылай һәләтле балалар башҡарған был эштәрҙе, тип улар өсөн һөйөнөп ҡуйҙым.
АВТОР фотолары һәм видеоһы.