Яңғырап торһон кескәйҙәр тауышы!

Айзиләгә 6 йәш кенә әле. Ғаиләләрендә иң бәләкәйе, быйыл мәктәпкә уҡыр­ға бара. Уның II синыфты тамамлаған Рушан ағаһы, Гүзәл (VI синыф) һәм Йәнгүзәл (IX синыф) апайҙары бар. Ә Янбулат ағаһы әрмелә хеҙмәт итә.
– Сыйырсыҡ ояһын атаһының бер туған ҡус­тыһы Айнур Морат улы менән бергә яһанылар. Ул мәктәптә технологиянан уҡыта. Матур килеп сыҡты, ояны элеп ҡуй­ҙыҡ. Айзилә менән көн дә сығып сыйырсыҡтарҙы күҙәтеп торабыҙ, һайрағандарын тыңлайбыҙ, – тип һөйләне әсәһе Ләйсән Миҙәхәт ҡыҙы.
Балалар баҡсаһына 16 бала йөрөй икән. Тәрбиәселәре Римма Сәйәр ҡыҙы Мәхийәнова булһа, уның ярҙамсыһы – Гөлшат Сабирйән ҡыҙы Шафиҡова.
– Кемеһелер йыр-бейеүгә, һүрәт төшөрөүгә маһир, ҡай­һы берәүҙәре шиғыр йә әкиәт һөйләргә оҫта – һәр баланың һәләтен асырға, үҫтерергә тырышабыҙ, – ти Римма Сәйәр ҡыҙы. – Иҙел Кирамов, Йософ Баймөхәмәтов, Тимур Моталлапов – конструкторҙан нимәлер төҙөргә, ә Сабир Суфиянов пластилиндан һындар әүәләргә ярата. Айсулпан Бикйәнова менән Айзилә Сафиуллина һүрәтте матур төшөрә. Индира Мусинаның ҡыҙҙарға оҫта итеп причёска яһағанын һоҡланып ҡарап тораһың. Илгизә Ғәлимйәнова – йырларға, ә Карина Мусина бейергә әүәҫ.
Айзиләне лә күрҙек, балалар баҡсаһында ла булдыҡ. Ҡырҙастың киләсәге бар, тип ҡыуанып ҡайттыҡ. Һәр ауылда ла кескәйҙәр тауышы яңғырап торһон ине.

М. ӘБЕШЕВ.
Әбйәлил районы.