Матбуғат менән таныштырыу

Мәктәп китапханасылары өсөн «Башҡортостандың билдәле кешеләре» ҡала конференцияһын Ленин районы китапханасылары етәксеһе Марина Валерьевна Ильичева һәм 14-се китапхана мөдире Наталья Михайловна Ишмырҙина ойошторҙо.
Конференцияла «Башҡортостан уҡытыусыһы», «Аманат», «Йәншишмә», «Шоңҡар» баҫмалары үҙҙәренең эшмәкәрлеге тураһында сығыш яһаны.

«Башҡортостан уҡытыусыһы» журналының баш мөхәррире Салауат Ғайса улы Кәримов китапхана ҡунаҡтарына белем биреү баҫмаһының эш үҙенсәлектәрен ҡыҙыҡлы итеп һөйләне, журналдың рубрикаларын күрһәтте, мәғрифәтселек эшмәкәрлегенә ҡағылышы булғандарҙың барыһын да тәжрибәләре менән уның биттәрендә уртаҡлашырға саҡырҙы.

«Шоңҡар» йәштәр баҫмаһы мөхәррире Заһиҙә Хәкимйән ҡыҙы Мусина ла журнал менән таныштырҙы, уның хеҙмәткәрҙәре, уҡыусылар аудиторияһы, йәштәр менән эшләү үҙенсәлектәре хаҡында бәйән итте.

«Йәншишмә» гәзитенең бүлек мөдире Римма Фәйзулла ҡыҙы Баймырҙина гәзиттең рубрикалары хаҡында һөйләне, хеҙмәттәшлектең өҫтәмә мөмкинлектәре хаҡында аңлатты.

«Аманат» журналының баш мөхәррир урынбаҫары Рәзил Айрат улы Бикбулатов балалар һәм үҫмерҙәр өсөн тәғәйенләнгән баҫма менән таныштырҙы, журналдың йәш ижадсыларҙы хеҙмәттәшлеккә йәлеп итеү буйынса әүҙем эшләүе хаҡында һөйләне.

Сараны «Ассорти-дэнс» бейеү коллективы йондоҙҙары һәм ҡурайҙа дәртле көйҙәр менән В.Н. Зотов исемендәге 46-сы лицейҙың VI «А» синыф уҡыусыһы Данис Хәсәнов биҙәне.