Кескәй дуҫтарыбыҙ янында

“Оя бүләк итәйек” бәйгеһендә лә үҙҙәре яһаған сыйырсыҡ оялары менән фотоға төшөп, эштәрен ебәргәйне улар. Әлбиттә, ҡошсоҡтарға оя эшләүҙә ата-әсәләре ярҙам итһә, тәрбиәселәре фотоларҙы “Йәншишмә”гә адреслап ебәргән. Әйткәндәй, тәрбиәсе апайҙары балалар баҡсаһындағы сараларҙы ла гәзитебеҙ биттәрендә даими яҡтыртып тора – әүҙем яҙышалар.

Конкурс тамамланыу уңайынан үҙҙәрен барып күреп, ҡатнашҡандары өсөн грамоталар тапшырҙыҡ, артабан дә әүҙем булыуҙарын теләнек. Әле уҡый белмәйҙәр, баҫмабыҙҙың һүрәттәрен генә ҡарайҙар, ә тиҙҙән гәзитебеҙҙә нимә яҙылғанын аңлай башларҙар! Башҡорт төркөмө лә бар бит балалар баҡсаһында, улар үҙ ижад емештәрен дә ебәреп торор.

Йылы осрашыу өсөн баҡса мөдиренә, тәрбиәселәргә, хеҙмәткәрҙәргә һәм кескәйҙәргә рәхмәт!