Уларҙы ҡыҙыҡһындырып, дәртләндереп кенә торалар. Кемдәрҙе маҡтайһығыҙ, тиһегеҙме? Әлбиттә, һүҙебеҙ Рәшит Назаров исемендәге Талбазы башҡорт гимназияһының тырыш, әүҙем уҡыусылары хаҡында. Яңыраҡ улар менән дә күҙгә-күҙ ҡарашып, ихлас осрашып ҡайттыҡ әле. Күптәре гәзитебеҙ ойошторған төрлө бәйге еңеүселәре бит. Бер барғанда барыһына ла бүләктәрен тапшырырбыҙ, тип осрашыуҙы кисектерә килгәйнек.
Гимназияла беҙҙе ҡыҙыҡлы сара көтә ине. Уҡыусылар ныҡлап әҙерләнеп, осрашыуҙы минең «Еңеү ҡайтыр атай менән/Отцы вернутся с победой» китабы геройҙарына арнағайны. Кисәне III, IV синыф уҡыусылары яугирҙарға бағышланған шиғыр һөйләп, йыр башҡарып башлап ебәрҙе. Концерттан һуң махсус хәрби операцияла ҡатнашҡан һалдат ағайҙарына хаттар яҙыуҙы ла ойошторҙолар. Изге теләктәр яҙылған бер ҡумта хатты беҙгә тапшырҙылар. Әйткәндәй, минең китапта гимназияның әүҙем уҡыусылары хаҡында яҙылған юлдар ҙа бар. Улар гәзитебеҙҙә ойошторолған «Өскөл хаттар» акцияһында ҡатнашып, яуҙағы һалдаттарға сәләмдәрен еткергәйне. Әлеге сарала ла был изге эш дауам ителде.
