Ынйыгөл Гран-при алып һөйөндө

Мәҙинә – моңло ҡурай, Әҙилә – Ай ҡыҙы Зөһрә, Урал – Һарыбай, Ынйы­гөл – ҡошҡа әйләнгән әсәй, ә иң кесе әкиәтсебеҙ – биш йәшлек Йәнгүзәл иң көслөһө кем икәне хаҡында һөйләп ишеттерҙе. Барлыҡ балалар ҙа лайыҡлы урындар яулап, грамоталар менән бүләкләнде.
«Һаумы, һаумы, әкиәт!» бөтә донъя халыҡ әкиәттәрен башҡорт телендә һөйләү буйынса ижади бәйгенең беренсе турында уңышлы сығыш яһаған Ынйыгөл Әбделғазина ҡала кимәлендәге турға сыҡты. Унда «Бер әсәнең зарыҡҡаны» башҡорт халыҡ әкиәтен бик оҫта башҡарып, Гран-приға лайыҡ булды!
Ынйыгөл әкиәтте аңлап, уны үҙенең сабый күңеле аша үткәреп, һоҡланғыс итеп сығыш яһаны. Моң һөйөүсән ҡыҙыбыҙ әкиәтен йыр менән тамамланы, һөйөклө әсәйҙәребеҙҙе яратырға, ихтирам итергә, ҡәҙерҙәрен белергә саҡырҙы.
Туған теленә, халҡыбыҙҙың ауыҙ-тел ижадына һөйөү тәрбиәләп үҫтергән ата-әсәһенә оло рәхмәтебеҙҙе еткерәбеҙ. Ә Ынйыгөлгә яңы уңыштар, үрҙәр теләп ҡалабыҙ.

Гүзәлиә ДӘҮЛӘТБИРҘИНА, тәрбиәсе.
Сибай ҡалаһы.