Был – мәктәптә йыш осрай торған күренеш, һылыу. Бер һине генә ул мәсьәлә борсомай. Иң беренсе кәңәшем: ҡулыңа ҡәләм алып, тойғоларыңды яҙ. Үҙеңә «Мин сығыш яһар алдынан нимә тоям?» тигән һорауҙы бир. Мәҫәлән, яуап «Ҡурҡыу тойғоһо» булды икән, икенсе һорау: «Мин нимәнән йә кемдән ҡурҡам?» Һәр яуапты яҡшыға борорға кәрәк. «Дуҫтарым алдында көлкөгә ҡалам», тиер урынға «Яҡшы итеп әҙерләнеп һөйләп, барыһын да һоҡландырам», тип уйла.
Тағы ла шуны әйтер инем: һәр тойғоноң сәбәбе бар. Ниндәй ваҡиғанан һуң ҡурҡа башлағаныңды, ҡасан булғанын, ниндәй хистәр кисергәнеңде хәтергә төшөр. Был хәлде үҙең ышанған яҡын кешеңә теҙеп һөйлә, хис-тойғоларыңа баҫым яһап бүлеш. Әхирәтең йә дуҫың алдында синыфтағы кеүек репетиция эшләп ҡарарға ла була.
Өсөнсөнән, ҡурҡыу, оялыу тойғоһон еңеп сығыуҙы үҙеңә бәләкәй генә маҡсат итеп ҡуй. Психолог булараҡ, һәр ҡурҡыу артында үҫеш тора, тип әйтер инем. Дәрескә яҡшы итеп әҙерләнеп барып, синыф алдындағы ҡурҡыуҙы, оялыуҙы еңһәң, артабан яңы үрҙәргә ынтылыш асыласаҡ, еңеү тойғоһо дәрт өҫтәйәсәк.
Һин быны, һис шикһеҙ, булдырасаҡһың!
Гөлиә ИСҠУЖИНА,
психолог.
Фото: triptonkosti.ru.