-7 °С
Болотло
VKOKfacebookTikTokInstagram
Бөтә яңылыҡтар

Һай, егеттәрҙең аҫылдары!

Тағы ла бер йыл менән хушлашабыҙ. Күңелгә нисектер бер аҙ моңһоу ҙа булып китә. Әтәс йылында булған ҡыуаныслы хәл-ваҡиғаларҙы, йәғни үткәндәрҙе барлайбыҙ. Киләһе Эт йылы имен-аман килһен, тип яҡшыға өмөтләнәбеҙ.

Тағы ла бер йыл менән хушлашабыҙ. Күңелгә нисектер бер аҙ моңһоу ҙа булып китә. Әтәс йылында булған ҡыуаныслы хәл-ваҡиғаларҙы, йәғни үткәндәрҙе барлайбыҙ. Киләһе Эт йылы имен-аман килһен, тип яҡшыға өмөтләнәбеҙ.

Өфөләге республика инженер интернат-лицейында XI синыфта уҡыусы Айҙар САЛАУАТОВ менән Нургиз МИҘӘТОВ та килер йылды бик тулҡынланып ҡаршылай. Бик яуаплы осор етте бит улар өсөн. Сығарылыш синыф уҡыу­сылары булараҡ, Берҙәм дәүләт имтиханын уңышлы тапшырырға ла, теләгән юғары уҡыу йортона уҡырға инергә лә, иң мөһиме, атай-әсәйең, уҡытыусыларың бағлаған өмөттәрҙе аҡларға кәрәк. Эх, Ҡыш бабайҙың тылсымлы таяғы ғына ярҙам итһә икән? Булмай шул. Бары тик үҙеңә ышанырға, нығыраҡ тыры­шыр­ға, бөтә көсөңдө уҡыуға һалырға кәрәк.

Әтәс йылы был егеттәр өсөн уңышлы ғына уҙған.

– Абитуриенттар өсөн ойошторолған күп олимпиадаларҙа ҡатнашып, еңеүҙәр яуланым. Августа Рәсәйҙең төрлө төбәктәренән килгән йәш химиктар менән «Сириус» белем биреү үҙәгендә ял итеп тә, ошо фән буйынса белемемде арттырып та ҡайттым. Лагерь һәләтле балалар өсөн тәғәйенләнгәйне. Бик оҡшаны, – ти Айҙар.

Алдағы көндәрҙә ул үҙен химияһыҙ күҙ алдына ла килтермәй. Ошо йүнәлештә университетҡа уҡырға инергә дәртләнеп йөрөй.

– Беҙҙе химия уҡытыусыбыҙ Айнур Мансур улы Ғүмәров еңеүҙәргә ҡеүәтләп, илһамландырып тора. Олимпиада төркөмөндә лә ныҡлы шөғөлләндек. Мәктәп, ҡала кимәлендә фәнни-ғәмәли конференцияларҙа ҡатнашып, көсөмдө һынаным. Химия буйынса лицейыбыҙҙағы ҡыш­ҡы-йәйге мәктәптә шөғөлләнеү ҙә белемебеҙҙе арттырыр­ға ярҙам итте. Химия турниры бигерәк хәтерҙә ҡалды. Ул БДУ бинаһында үтте. Беҙ 4 кешенән торған команда менән барҙыҡ. Уҡыусылар араһынан сығыш яһаусы, оппонент, рецензенттар һайлап ҡуйылды. Бер аҙҙан был ролдәрҙе икенселәр башҡарып ҡараны. Бик ҡыҙыҡлы ғына килеп сыҡты. Мин «Иң яҡшы сығыш яһаусы» номинацияһында бүләкләндем. Ә беҙҙең команда еңеүсе булып танылып, Бөтә Рәсәй йомғаҡлау этабында ҡатнашыу хоҡуғы алдыҡ, – тип хәтирәләре менән бүлеште Өфө дәүләт нефть университетына уҡырға инеп, фәнни эшмәкәрлек менән ныҡлабыраҡ шөғөлләнергә теләгән Нургиз.

Ҡатмарлы фәнгә мөкиббән киткән егеттәргә Эт йылы ла матур тәьҫораттар, яңы үрҙәр, еңеүҙәр алып килһен!

Гөлназ ШӘЙХЕТДИНОВА.
Өфө ҡалаһы.