Бишек йырын беләһеңме?

Балаларҙы халҡыбыҙҙың бишек йырҙары менән таныштырыу, уларҙың эстәлеген һәм тәрбиәүи үҙенсәлектәрен асыҡлау, әсәй-атайҙарыбыҙҙың, өләсәй-олатайҙарыбыҙҙың моңло бишек йырҙарына һөйөү тәрбиәләү – беҙҙең, тәрбиәселәрҙең, изге бурысы.

Ошо уңайҙан «Әкиәт» балалар баҡсаһында «Бишек йыры» байрамы гөрләп үтте. Музыка залы башҡорт халҡының көнкүреш әйберҙәре, урындыҡ, бишек менән бик матур итеп биҙәлгәйне. Сараға һәр төркөмдән өләсәй, әсәй, ейән, ейәнсәрҙәр саҡырылды. Өләсәйҙәр төрлө бишек йыр­ҙарын бик оҫта башҡарһа, әсәйҙәр әүрәт­кес әйтеүҙә һынатманы. Ейән-ейәнсәр­ҙәр иһә шиғри күстәнәстәрен бүләк итте. Һәр ғаилә үҙенең шәжәрә ағасын, ҡул эштәрен, яратҡан аш-һыуҙарын да алып килгәйне.
Музыка етәксеһе Фәниә Йомабай ҡыҙы Сәйфуллина үткәргән байрам бик күңелле, файҙалы һәм фәһемле булды. Уның барышында мәктәпкәсә белем биреү һәм өлкәндәр төркөмө тәрбиәләнеүселәре бишек йырҙарын башҡарҙы.
Байрамға килтерелгән күстәнәстәрҙе тәмләп сәй эсеү менән тамамланды ма­тур кисә. Барыһы ла күркәм саранан үҙҙәренә рухи аҙыҡ алып, күтәренке кәйеф менән таралышты.

Баймаҡ ҡалаһы.