Ҡурайҙа «Урал» халыҡ көйө яңғырау менән сәхнәгә сығып баҫҡан уҡыусылар башҡарыуында бер-бер артлы туған телебеҙгә арналған береһенән-береһе матур шиғырҙар һөйләнде. Башҡортостан Гимнын да тантанаға килеүселәр аяғүрә баҫып алҡышланы.
Фәнилә Ноғоманова етәкселегендәге «Талисман» төркөмө башҡарған йырҙар, Лилиә һәм Радик Хәлиловтарҙың, «Аҡбуҙат» ансамбле бейеүҙәре лә тамашасылар күңеленә хуш килде. «Талисман» вокал ансамблендә II «Б» синыфы тотошлай шөғөлләнһә, Әлфиә Әминева етәкселегендәге III «В» синыфы уҡыусыларынан торған «Аҡбуҙат» ансамбле лә төрлө йыйын-концерттарҙың йөҙөк ҡашы булып тора. Өсөнсөләр спорттан да ситтә ҡалмай. Уларҙың киләсәктә лә шулай тырыш, алдынғы, әүҙем, өлгөр булыуҙарын теләйбеҙ.
Зөһрә КАШАПОВА.
Әбйәлил районы,
Асҡар ауылы.