Свердлов өлкәһендә быйыл яҡташ яҙыусылары хөрмәтенә Президент фонды ярҙамы менән «Бажов һәм башҡорттар» проекты ла тормошҡа ашырыла икән. Әйткәндәй, Нәжиб Иҙелбай был Урал яҙыусыһының әҫәрҙәрен башҡортсаға тәржемә иткән. Уҡыусылар саралар ваҡытында Павел Бажовтың «Алтынсәс» әкиәтен урыҫ һәм башҡорт телдәрендә уҡый. Викторина һорауҙарына яуап бирәләр.
Башҡортостан менән тығыҙ бәйләнештә йәшәй күрше өлкәлә йәшәгән милләттәштәребеҙ. Йәй көнө «Тамырым – башҡорт» тигән бик шәп форумға төрлө өлкәләрҙән балалар йыйылды. Улар өсөн бай программа әҙерләнгәйне. Бәләкәй милләттәштәребеҙ Башҡортостандан халҡыбыҙҙың тарихын өйрәнеп, дәртләнеп, киләсәккә пландар төҙөп ҡайтты.
Рөстәм Ҡалмырҙин, мәҫәлән, үҙҙәрендә үткән «Урал батыр», «Һеңлекәш» фестивалдәрендә ҡатнашып, форумға юллама алған ине.
– Олатайым – Түңгәүер ырыуынан. Уның яғынан 7 быуын шәжәрәбеҙҙе беләбеҙ. Ә өләсәйемдең 9 быуынға тиклем шәжәрәһе төҙөлгән. Ул – Бөрйән ырыуынан. Артабан тамырҙарыбыҙҙы өйрәнеүҙе дауам итәбеҙ. Өфөлә архивта 5 мең кешенең тарихы яҙылған документтарҙы күреү, Шүлгәнташта боронғо һүрәттәрҙе ҡарау, мәмерйәгә 4 мең йыл икәнен белеү ныҡ тәьҫир итте. Үҙем өсөн Башҡортостанды икенсе яҡтан астым. Башҡорт телен өйрәнәсәкмен. Был миңә халҡыбыҙ мәҙәниәтен, Башҡортостанды яҡшыраҡ белергә ярҙам итер, – тигәйне Рөстәм.
Екатеринбургтағы 167-се мәктәптән Владик Сисәнбаев «Күгәрсен» башҡорт-татар ансамбленә йөрөй икән. Бейей һәм йырлай. Патруши тигән ауылдан Иван Прямиков «Йәдкәр» башҡорт халыҡ театрында шөғөлләнә.
– Мин Ҡатай ырыуынан, Ҡурған өлкәһенән буламын. Киләсәктә республика башҡорт инженер интернат-лицейында уҡырға теләйем. Алтынай Вәлитовтың концерт-дискотекаһы, төрлө яҡтарҙан килгән тиҫтерҙәр менән аралашыу, Салауат Юлаев һәйкәле бик оҡшаны, – ти Иван.
– Башҡортостанда булырға яратам. Ә был форумда уның тураһында күберәк белдем, республика миңә тағы ла яҡыныраҡ булып китте. Тамырҙарыңды өйрәнеү мөһим икәнен аңланым, был кешене рухи яҡтан байыта. Шәжәрәмде лә төҙөгөм килә. Хәҙер мин Башҡорт иле тураһында тағы ла күберәк белергә тырышам. Фортепьянола башҡорт көйҙәрен өйрәнәм. Бәлки, конкурстарҙа ла ҡатнаша алырмын. Әсәйем яғынан тамырым – башҡорт, туғандарым Ауырғазы районында йәшәй, – ти Аделина Мөхәмәтшина.
Э. ҒӘЛЛӘМЕТДИНОВА.