Рәшит Назаровҡа арнап

Бәйгене гимназиябыҙҙың директоры Светлана Рәшит ҡыҙы Юлмөхәмәтова асып ебәрҙе. Конкурста ҡатнашыусыларҙы район мәғариф бүлеге начальнигы Рөстәм Әнүәр улы Ғилә­зетдинов сәләмләп, киләһе 2024 йылда Рәшит Назаровтың тыуыуына 80 йыл тулыуға арнал­ған сараларҙың планға индерелеүен хәбәр итте.
Яҡташыбыҙҙың ижадын әүҙем пропагандалаусы уҡытыусыбыҙ Светлана Николаевна Атмасова конкурсанттарға уңыштар теләп, «Йөрәк» шиғырын сыуаш телен­дә уҡып күрһәтте. Уның сығышы дәррәү алҡыштарға күмелде.
Сара концерт номерҙары менән үрелеп барҙы. Рәшит Назаровтың шиғырҙарын башҡорт, татар, урыҫ, сыуаш, хатта инглиз телдәрендә лә илһамланып, тас­уири һөйләүсе конкурсанттарыбыҙ күп булды.
«Бөтә ғаләм – ҡәләм осонда» шиғыр һөйләүселәр бәйгеһен ябыу тантанаһында еңеүселәрҙе Ауырғазы районы хакимиәте баш­лығының социаль эштәр буйынса урынбаҫары Азат Рәфҡәт улы Әлимбәков ҡотланы. Ул иң-иңдәр­гә Почёт грамоталары һәм иҫтә­леккә билдәле «Кирач» оҫтаханаһының Рәшит Назаров портреты һынландырылған магниттарын бүләк итте.
Еңеүселәрҙе «Дуҫлыҡ» ҡурайсылар ансамбле, бейеүсе ҡыҙҙарыбыҙ һәм VI шайморатовсылар cиныфы ҡотланы.
Сарала ҡатнашҡан уҡыусылар­ға, уларҙы әҙерләгән уҡытыусыларға, килгән ҡунаҡтарға оло рәхмәтебеҙҙе еткерәбеҙ.
Рәшит Назаровтың ижады йәшәй һәм йәшәйәсәк!

Лиана ЙӘЛИЛОВА, йәш хәбәрсе.

Ауырғазы районы,

Рәшит Назаров исемендәге Талбазы башҡорт гимназияһы.