Телебеҙҙе юғалтмайыҡ!

Беренсе синыф уҡыусылары үҙәк балалар китапханаһында “Туған телемде яратам” тип аталған кисәлә ҡатнашты. Хеҙмәткәрҙәр беҙҙе ихлас ҡаршы алды. Улар телдәр тураһында ҡыҙыҡлы мәғлүмәттәр менән таныштырҙы, уйындар уйнатты, һорауҙар бирҙе.

Шулай уҡ “Тел – милләт йәне” тип аталған китап күргәҙмәһе лә уҡыусыларҙа ҙур ҡыҙыҡһыныу уятты.

Балалар тел тураһында шиғырҙар һөйләне, “Башҡорт телендә һөйләшәм” йырын башҡарҙы. Китапханасы апайҙар балаларға китаптар бүләк итте.

Ер шарында йәшәүсе халыҡтар 6 меңгә яҡын телдә аралаша, уларҙың күптәре – юғалыу сигендә. 21 февраль – һәр халыҡтың үҙ телен ҙурлау көнө. “Теле барҙың – иле бар” ти был турала башҡорт халыҡ мәҡәле. Шуға күрә телде һаҡлау, киләсәк быуынға еткереү – бөгөнгө көндә һәр кемдең бурысы .

Айгөл ҺАТЛЫҠОВА,

башланғыс синыфтар уҡытыусыһы.

Ауырғазы районы,

Рәшит Назаров исемендәге Талбазы башҡорт гимназияһы.