"Мин башҡортса һөйләшәм, ә һин?"

Был телде, музыканы, ижадты һәм заманса башҡорт мәҙәниәтен берләштергән ҙур мәҙәни сара.

Фестиваль open-air концерт форматында уҙасаҡ һәм башҡорт телен заманса музыка, йәнле аралашыу һәм мәҙәни бәйләнештәр аша популярлаштырыу майҙансығына әүереләсәк. Проекттың төп маҡсаты — башҡорт теленең хәҙерге ҡала мәҙәниәтенең тәбиғи теле булыуын күрһәтеү.

Фестиваль тарихы 2019 йылда башланды, 2026 йылда ул өсөнсө тапҡыр үткәрелә. Сара төрлө йәштәге кешеләрҙе туған тел һәм мәҙәниәт тирәләй берләштереүен дауам итә. Айырыуса 2024 йылдағы фестиваль уңышлы үтте. Уның сиктәрендә белем биреү һәм ижади майҙансыҡтар, оҫталыҡ дәрестәре, театр постановкалары, шиғри сығыштар ойошторолдо. Көн дауамында ҡатнашыусылар башҡорт халҡының йолалары, кәсептәре һәм мәҙәниәте менән танышты, ә киске open-air концертына 8 меңдән ашыу кеше йыйылды. Фестиваль киң танылыу алды һәм республикала башҡорт телен популярлаштырыуҙың заманса форматтарына ҙур ҡыҙыҡһыныу булыуын иҫбатланы.

«“Мин башҡортса һөйләшәм” фестивале башҡорт теленең заманса, сағыу һәм йәштәр тормошоноң айырылғыһыҙ өлөшө була алыуының асыҡ миҫалы. Быйыл беҙ музыкаль программаға айырыуса ҙур иғтибар бүләбеҙ, сөнки музыка туған телгә һәм мәҙәниәткә ҡыҙыҡһыныу уятыуҙың иң һөҙөмтәле юлдарының береһе. Беҙҙең маҡсат  башҡортса һөйләшеүҙең тәбиғи, ҡыҙыҡлы һәм абруйлы булыуын күрһәтеү», — тип билдәләне Башҡорт телен һаҡлау һәм үҫтереү ойошмаһы директоры Гөлназ Йосопова.

2026 йылда ойоштороусылар проекттың музыкаль өлөшөнә төп иғтибарҙы йүнәлтә. Ҡунаҡтарҙы башҡорт телендә ижад иткән заманса башҡарыусылар ҡатнашлығындағы ҙур асыҡ һауалағы концерт һәм мастер-кластар көтә. Музыка, ижад һәм йылы мөхит аша фестиваль башҡорт теленә ҡыҙыҡһыныуҙы арттырыуға, йәштәр араһында туған телдең ыңғай образын формалаштырыуға һәм заманса милли мәҙәниәтте үҫтереүгә булышлыҡ итәсәк.

Үткәреү датаһы: 2026 йылдың 26 июне

Ваҡыты: 18:00–23:00

Үткәреү урыны: Арт-КВАДРАТ, Өфө ҡалаһы

Инеү ирекле.

Фестиваль Башҡортостан Республикаһы Башлығы гранттары фонды ярҙамында үткәрелә.

Сараны ойоштороусылар: «Сәсәндәр үҙәге» ойошмаһы, Башҡорт телен һаҡлау һәм үҫтереү ойошмаһы, Башҡортостан Республикаһы Өфө ҡалаһы ҡала округы хакимиәте.

6+

https://vk.com/bash_fond