+17 °С
Облачно
Шиғырҙар
24 Мая 2021, 03:35
Йәшәгеләр килә йырлай-йырлай
Һеҙҙең иғтибарға мәғариф ветераны, шағирә Миңлегөл Хисамованың шиғырҙарын һәм йырҙарын тәҡдим итәбеҙ.
ЙӘШӘГЕЛӘР КИЛӘ ЙЫРЛАЙ-ЙЫРЛАЙ
«Таш өйҙәргә инеп бикләнәбеҙ.»
Римма Солтанова.
Таш өйҙәргә инеп бикләнәбеҙ,
Күңел ҡата мәллә таш булып,
Таш юлдарҙан йөрөп арыйбыҙ ҙа,
Уйланабыҙ күҙгә йәш тулып.
Яҙмыш йөрөтәлер бәндәләрҙе,
Юҡтыр яҙмышыңдан уҙмышың,
Ғүмер ҡәҙерҙәрен һуң беләбеҙ,
Көткән кеүек алда йөҙ ҡышың.
Китәһеләр килмәй был ерҙәрҙән,
Ожмах булмаһа ла таш өйөң,
Йәшәгеләр килә йырлай-йырлай,
Юғалтмайса бары үҙ көйөң...
ЙЫР МЕНӘН
Йыр менән бишек бәүелә,
Йыр менән тыуа һөйөү,
Ваҡлыҡтар ҙа артҡа сигә,
Булмаҫ башыңды эйеү.
Күңелең ҡатҡан саҡтарҙа,
Моң көйләһәң эсеңдән,
Ҡанатланып осҡандайһың,
Тау аҡтарыр көсөңдө.
Тапҡандайһың ошо мәлдә,
Нимәгә был нотоғом?
Йыр ул – күңел һыуһағанда,
Татлы моңдоң йотомо.
ЙЫРҘАР КҮҢЕЛ ТҮРЕНДӘ
Йыр ул – күңел хазинаһы,
Йыр ул – йөрәк аһы ла,
Унда ата-бабаларҙың
Түккән ҡаны яҙыла.
Ишетелә бығауҙарҙың
Сыңлап киткән тауышы,
Йыр ул – ләғнәт дошманына,
Йыр ул – йәрҙәр ҡауышыу.
Йыр әйҙәгән башҡорттарҙы
Данлы, шанлы яуҙарға,
Ут эсендә дөрләп янған,
Кискән боҙло һыуҙарҙы.
Һис йырынан яҙмаған ул,
Данлап тыуған илкәйен,
Башын һалған моңо менән,
Ҡосоп тыуған еркәйен.
ЕРҺЕНМӘНЕМ
Ерһенмәнем сит илдәрҙе,
Алтыны ҡойолһа ла,
Хыялымды балҡытһа ла,
Иҫ киткес тойолһа ла.
«Сит илдә солтан булғансы,
Үҙ илеңдә олтан бул».
Ошо аҡыл йөрәгемдә,
Хаҡлығыма тура юл.
Ят ерҙәргә һоҡланырмын,
Ҡот алырмын илемдә,
Күңелемдә моң уяныр,
Йырлаһам үҙ телемдә.
Шишмәләр ағыр сылтырап,
Бары үҙ тупрағымда,
Илһам йәнемде йәшәртер,
Ижадым – ҡот һағында.
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
