Юғалмаһын ғәзиз телем!

Туған телем – башҡорт теле

Үтә лә бай тарихлы,

Ҡай саҡ тәрән уйға һала,

Бер саҡ күтәрә рухты.

Башҡортлоҡ – минең ҡанымда,

Яратамын телемде!

Хистәремде еткерергә

Әйтә алам һүҙемде!

Был һөйөүем сиктән ашһа,

Өләшәм тирә-яҡҡа.

Эргә- тирәмдә бары ла

Беләләр ошо хаҡта.

Мин генәме?! Барса ғаләм

Ғашиҡ икән телемә!

Таныш ауаз ишетәм дә,

Балаларса һөйөнәм!

Ана, түбәнән тамсылар

“Та- мам!”- тиеп тамалар,

Турғайҙар ҙа саф башҡортса

“Сыҡ, сыҡ” - тип саҡыралар.

“Килтереп бииир” – тиһә әтәс,

Тиҙ үк ем бирә һалам.

“Торррайҡ!” - тиһә торналар,

Тора һал, ятма, балам!

Сит телдәргә ныҡлы күпер

Һалынмай унан башҡа.

Юғалмаһын ғәзиз телем –

Яҙып ҡалдырам ташҡа!

Люциә ФАЗЛИӘХМӘТОВА, башланғыс синыфтар уҡытыусыһы.

Миәкә районы, Ҡаран-Ҡуңҡаҫ мәктәбе.

Фото:https://yandex.ru/images/search?from