Һаумы, август!

Һаумы, август! Һинең менән ҡабат

Осрашабыҙ ваҡыт юлында.

Уйлайһыңдыр: "Тағын иҫәнләшә...

Ни бар икән бының уйында?"

Бер ҙә ҡурҡма, август!Беҙҙең мутлыҡ

Аҙашып ҡалды апрель-майҙарҙа.

Эйәрмәксе ине... Аймылыштыҡ...

Йөрөй икән бахыр ҡайҙарҙа?

Ә һин, август, олпат һәм мәһабәт!

(Юҡҡамы һин батша исемле?!)

Йылы һәм һалҡының - сама менән:

Үлсәүҙәргә һалған шикелле.

Байлыҡ ҡыҙғанмайһың - бүлешәһең.

Балҡышыңдан күҙҙәр ҡамаша.

Беҙгә ни кәрәген һин беләһең:

Икмәк булһын! Һәм дә тамаша!..

Һинең янда ҡайҙа ул шаярыу?

Килә батшабикә булаһы!

Илдә булмаһа ла - үҙ йәнемдә

Ғәҙел хакимлыҡтар ҡылаһы....

Һаумы, август!Һине тормошома

Остаз итеп әллә алаһы?..

Йылдар тәгәрмәсен әйләндереп,

Бараһы ла әле, бараһы...

Бараһы ла...Бер көн ҡалаһы...

Лилиә СӘҒИҘУЛЛИНА.

Фото: postimg.cc