+28 °С
Болотло
Шиғырҙар
19 Октябрь 2022, 05:10
Илһөйәрлек
Әсә һөтө, наҙы менән генә
Һеңә илһөйәрлек күңелгә.
Тарихыңды, киләсәкте һөйөү –
Һатып алыр тойғо түгел дә.
Тамырыңдың тәрәнлеген тойоу,
Тыуған яҡҡа аяҡ тартыуы.
Йыһандағы урыныңды уйлап,
Йәшәү мәғәнәһе артыуы.
Илһөйәрлек атай-әсәйеңде
Йылы һүҙҙән мәхрүм итмәүең.
Атай-олатайҙар зыяратын
Хаж ҡылмайса ситкә китмәүең.
Илһөйәрлек – әгәр табандарың
Иркәләнеп баҡһа тупраҡҡа.
Тәбиғәтем алтынланды, тиеп
Һөйөп бағыу төшкән япраҡҡа.
Илһөйәрлек – күрше-күләнеңдең
Ҡайғы-шатлыҡтарын бүлешеү.
Илһөйәрлек – Ҡафтау артындағы
Туғаныңдың хәлен белешеү.
Илһөйәрлек – инде мең быуатлап
Килгән йолаларға таяныу.
Аһ, халҡым, тип ятып китеүҙәрең,
Аһ, балам, тип килеп уяныу.
Гөлнара ХӘЛФЕТДИНОВА.
Фото: tendencii.com
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
