-8 °С
Болотло
TelegramТестарVKOK
Бөтә яңылыҡтар
Шиғырҙар
26 Ноябрь 2022, 13:55

Балаңа

Лариса АБДУЛЛИНА

Балаңа
Балаңа

Башҡортса көйлә балаңа —

Бишектән һеңә моңдар.

Сабый саҡтан ишеткәнен

Ул ғүмер буйы тыңлар.



Башҡортса өндәш балаңа —

Хәйерле көндәр телә.

Әсәй башҡортса һөйләшһә,

Бала башҡортса белә.


Атай башҡортса һөйләшһә,

Бала аңлай үҙ халҡын.

Бикләп ҡуйма мең йоҙаҡҡа

Ата-бабалар хаҡын.


Әкиәт һөйлә балаңа —

Унда батырҙар еңә.

Яҡшылыҡ маяҡ булыуы

Ул сабый саҡтан һеңә.


Шәжәрә төҙө балаңа —

Ниндәй ҡеүәтле тамыр!

Бер ҡәүемдең вариҫтары

Бер-берен һәр саҡ таныр.


Башҡортса ярат балаңды —

Һөйөп ал арҡаһынан.

Бала наҙҙы һәр саҡ көтә

Әсәһе, атаһынан.



Башҡайынан да һыйпап ал,

Ул яратыуҙы тойһон.

Мөхәббәтле был донъяла

Йәненә һөйөү тулһын!

Фото: addnt.ru

Автор:Юлиә Кирәева
Читайте нас в