+26 °С
Ясно
Шиғырҙар
13 Января 2023, 04:50
Бөйөклөк
Зәйнәб БИИШЕВА
Бөйөклөк
Бөйөклөк ул туй бүләге түгел,
Дан-дәрәжә түгел бөйөклөк.
Ярап, һорап алып булмай уны,
Бик-бик теләһәң дә, һөйөклөм!
Тәхет түгел – нәҫел-нәсәп аша
Улдан-улға күсмәй бөйөклөк.
Әүеш-тәүеш итеп, ҡулдан-ҡулға
Күсереп тә булмай ул йөктө.
Бөйөклөктө раҫлап алып булмай
Ҡорал көсө менән, үс менән.
Ысын бөйөклөктәр яуланалар
Оло йөрәк, изге эш менән.
Үҙ буйынан бейек, бөйөкмөн, тип,
Ышанғандан төптө ҡаса ул.
Бөйөклөккә дәғүә иткән бәндә
Ил өҫтөнә төшкән яфа ул.
Бөйөкмөн, тип оран һалып була,
Әммә ул бит тыумай орандан.
Ысын бөйөк ирҙәр йөҙ йылға бер
Килер булған, тиҙәр, борондан...
Бөйөктәрҙе заман, ер тыуҙыра
Кәрәк саҡта илгә, халыҡҡа,
Ғәҙелһеҙлек сиктән ашҡан саҡта,
Сарсағанда кеше хаҡлыҡҡа.
Фото: bashgazet.ru
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
