Төн ҡараһын алһыу таңға ялғап,
Таба алмай тыныр сараларын,
Мин үҫтерҙем һеҙҙе бәхет юрап,
Йөрәк ярып тапҡан балаларым.
Был донъялар гелән борсолдора,
Уйҙарымда ауыл-ҡалалары,
Ҡайҙа йөрөп, ниҙәр эшләһә лә,
Тик уңышлы булһын балаларым.
Ҡағылмаһын уҫал дауылдары,
Урап үтһен бәлә-ҡазалары,
Йөрәгемдә булыр ғүмер буйы
Күҙ нурымдай күргән балаларым.
Һеҙгә терәк булып йәшәр өсөн
Етһен генә ине самаларым,
Бар йәшәүем ерҙә һеҙҙең өсөн,
Ғәзиздәрҙән-ғәзиз балаларым.
Фирүзә АБДУЛЛИНА.
Фото: userapi.com