Әсәй – тормош бишеге

Урындыҡҡа һырындыҡ.
Урындыҡтан йылындыҡ,
Һөйөүенә урандыҡ,
Доғаһына һыйындыҡ,
Наҙ нурына ҡойондоҡ,
Йоҡоларҙан уяндыҡ та
Әсәй бар, тип ҡыуандыҡ.
Яманлыҡтан тыйылдыҡ,
Яҡшылыҡҡа туйындыҡ.

Үҫеп еттек, һибелдек,
Мәрйен булып тирелдек.

Әсәй — һаман урындыҡ,
Өйөбөҙ бар, нигеҙ ныҡ.
Өйөбөҙҙөң биге ныҡ,
Өйөбөҙҙөң түре ныҡ!

Әсәй – өйҙөң ишеге,
Әсәй – тормош бишеге.
Әсәй барҙа донъяның
Юҡ ямауы, тишеге.

Әсәй – күңел янсығы,
Әсәй – ҡояш ярсығы.
Әсәй – ҡылыс яу сығыр.
Әсәй – бөркөт, ҡарсыға,
Балам, тиеп өҙөлә лә,
Балам, тип йәне сыға.

Әсәй — йыһан орсоғо
Көтә, тетә, иләй ҙә,
Донъя һабын көйләй ҙә,
Донъя ебен төйнәй ҙә,
Донъя йөгөн һөйрәй ҙә!

Әсәй – нескә тал сыбыҡ.
Ҡуя ҡайсаҡ талсығып.
Тик һис ҡасан төңөлмәй,
Башын баҫып, өңөлмәй.

Әсәй – сер, әсәй – һандыҡ.
Әсәйҙәргә таяндыҡ.
Йәшәүгә көс-ҡеүәтте
Әсәй нурына мандыҡ,
Әсәй йырынан алдыҡ.

Әсәй — ҡуҙ ул, көлдөксә,
Усаҡ яна мейестә.
Мең биҙәкле ҡулдары
Һаман әүәләй көлсә.

Әсәй – изге монаят,
Әсәй – им, әсәй – ҡанат.
Әсәйҙән күсә беҙгә
Киләсәккә аманат.

Әсәй ҡурсыусы доға,
Әсәй – фатиха, аят.
Йөрәгеңдең яраһына
Әсәй дауаларын яп!

Әсәй– тылсымлы даға,
Әсәй – һаҡлаусы яға.
Йәшәү йыры, йәшәү нуры
Әсәй һөтөнән аға.

Әсәй – донъя кендеге,
Әсәй – тормош билдеге.
Ел үткәрмәҫ таш ҡәлғә,
Әсәй – нигеҙ төндөгө.

Әсәй – аҫыл ҡобайыр,
Әсәй – асыл, әсәй – йыр.
Әсәй – Ер, әсәй – Һауа,
Әсәйҙең тыны – дауа!

Һис юйылмаҫ хәҡиҡәт,
Һис иҫкермәҫ мөнәжәт.
Әсәй йәне – Йәнбикәнән –
Тын, тәрән, оло, ғәжәп!

Әсәй – мәңге йәшәр көс,
Әсәй – мәңге балҡыр хис.
Әсәй, тиеп атыр таң,
Әсәй, тиеп етер кис.

Әсәй — донъя бителер,
Әсәй — йөрәк ителер.
Әсәй, тиеп тыуылыр,
Әсәй, тиеп кителер...

 Айзилә МОРТАЕВА.

Сығанаҡ: "Хазина" төркөмө.

Фото: "Доғалы йорт" төркөмө.