Белем усағы үҙенең спортсылары менән электән үк дан тота. Мәктәпкә директор итеп Айвар Радик улы Саҙретдинов тәғәйенләнгәс, ҡатнаш көрәш секцияһына йөрөүселәр ныҡ күбәйҙе. Сөнки етәксе балаларҙы ҡыҙыҡһындыра белә, етмәһә, үҙе өйрәтә был спорт төрө алымдарын.
Районыбыҙҙа ҡатнаш көрәш популярлыҡ яулай. Беҙҙәге секцияла шөғөлләнер өсөн башҡа ауылдарҙан да киләләр. Мәҫәлән, Әмирхан Әсмәндийәров Ахундан. Уны олатаһы оҙатып йөрөй. Балалар баҡсаһынан кескәйҙәр ҙә бар. Сорғот ҡалаһынан каникулға ҡайтҡан балалар ҙа Айвар Радик улы алып барған секцияла ихлас шөғөлләнә.
Хәҙер күптәре оҫтарып алған. Улар бөтә донъяға билдәле Джефф Монсон исемендәге приз өсөн алышта, Силәбелә панкратион буйынса турнирҙа уңышҡа ирешкән. Бына әле яңыраҡ Ҡырымдағы Алушта ҡалаһына барып ҡайттылар. Салауат тоҡомдары унда ла һынатманы. Ленария Мөхәмәтйәнова алтын миҙал һәм Гран при яулаһа, Розалиә Ғарипова, Милена Хәкимова, Алтынай Шөғәйепова, Камил Камалов икенсе урын алды. Ә Зилина Йәғләмүнова үҙ ауырлыҡ үлсәмендә өсөнсө булды. Әмирхан Әсмәндийәров менән Ильяс Ситдиҡов та маҡтауға лайыҡ.
– Алушталағы турнирға автобуста барҙыҡ. Алыҫ ҡына ара. Юл арытһа ла, спортсыларыбыҙ һынатманы. Күп миҙалдар алып ҡайттыҡ, – ти ғорурлыҡ менән Айвар Радик улы.
Мәктәп директорынан уңды. Балаларҙың тырышлыҡтарын күреп, дәртләндерә белгәне өсөн уға ата-әсәләр исеменән рәхмәт әйтәбеҙ.
Гөлнара МӨХӘМӘТЙӘНОВА.
Салауат районы,
Әлкә ауылы.