+12 °С
Ямғыр
Бөтә яңылыҡтар
Тәбиғәт мөйөшө
7 Октябрь 2019, 19:21
Көҙһылыу дуҫтарын йыйҙы
Бына инде матур йәй үтеп, Көҙһылыу үҙенең ямғырҙары, ҡояшы, һыуығы менән килеп тә етте. Уның бер илаһи матурлығы бар бит! Ағастар, ҡыуаҡлыҡтар төрлө-төрлө төҫтәргә инеп, күҙ яуын алып ултыра, ә баҡсаларҙа, парктарҙа, урамдарҙағы сәскәләр ниндәй һоҡланғыс!
Шундай матур бер көндө интернат-лицейҙың III синыф уҡыусылары беҙҙең китапханаға «Тәбиғәт йылмайыуы» тип аталған байрамға йыйылды. Был сараға матур презентация һәм күҙ яуын алып торған көҙгө сәскәләрҙән күргәҙмә әҙерләнде. Кисәбеҙ Гөлсирә Шафиҡованың «Сәскәләр» шиғыры менән асылды, артабан йомаҡ сисеү ысулы менән төрлө баҡса, ялан сәскәләре менән таныштырҙыҡ, уларҙың урыҫса һәм башҡортса нисек аталыуҙары, тәбиғәт үҫентеләренә һаҡсыл ҡарау тураһында әңгәмә үткәрҙек.
Шуныһы ҡыуандырҙы: балалар тере күргәҙмәләге бөтә булған сәскәләрҙең (32 төр) исемдәрен дөрөҫ әйтеп бирҙе, ауылда, ҡалала үҙҙәренең баҡсаларында ниндәйҙәрен үҫтереүҙәре хаҡында һөйләне. Улар башҡорт шағирҙары Гөлсирә Шафиҡова, Фәрит Суфиянов, Фәрзәнә Ғөбәйҙуллина, Айһылыу Йәғәфәрова, Зөлфиә Камалованың шиғырҙарын яттан һөйләне, йырҙар башҡарҙы, төрлө уйындарҙа әүҙем ҡатнашты. «Сәскәләр байрамы» кроссвордын да дөрөҫ систеләр. Байрамда әүҙем ҡатнашҡандар Маҡтау грамотаһы, тәмлекәстәр менән бүләкләнде, ә тәрбиәсе Гүзәл Ҡанафинаға Рәхмәт хаты тапшырылды. Кисәне әңгәмә һәм шиғыр юлдары менән тамамланыҡ.
25-се «Тирмәкәй» балалар баҡсаһында ла «Көҙһылыу дуҫтарын йыя» тигән кисә ойошторҙоҡ. Ул көҙ миҙгеленең билдәләре тураһында әңгәмәнән башланып китте. Урман-тауҙарҙың төрлө төҫтәргә инеүе, көндәрҙең ҡыҫҡарыуы, һалҡынайыуы, төндәрҙең оҙонайыуы, ҡайындарҙың һары, ә миләштәр һәм сағандарҙың ҡыҙғылт һары күлдәктәр кейеүе көҙ етеүен белдерә, тигән фекергә килдек балалар менән. Кескәйҙәр үҙҙәренең зирәклеген кроссворд һәм йомаҡтар сискәндә лә иҫбатланы. Артабан күмәкләшеп төрлө уйындар уйнаныҡ. Мәҫәлән, «Уңыш йыйыу» тигәнендә ике биҙрәгә емештәр менән йәшелсәләрҙе айырҙыҡ. «Серле тоҡсай»ҙа ҡул менән генә тотоп ҡарап, йәшелсәне йә емеште таныныҡ. «Комплимент»та көҙҙөң беҙгә оҡшаған сифаттарын атаныҡ.
«Көҙһылыу дуҫтарын йыя» тип аталған китаптар күргәҙмәһе менән таныштырып, был миҙгелгә бағышланған шиғырҙар һәм хикәйәләр уҡыныҡ. Балалар үҙҙәре лә көҙ тураһында бик күп шиғырҙар белә икән: беҙгә ятлап ишеттерҙеләр.
Байрамыбыҙ шундай йылы һәм күңелле уҙҙы, хатта тышта яуған ҡарлы ямғыр ҙа кәйефтәрҙе боҙа алманы. Һуңынан балаларға Көҙһылыуҙың күстәнәстәрен тараттыҡ.
Флүрә ШАКИРОВА, Дауыт Юлтый исемендәге китапхана етәксеһе.
Белорет ҡалаһы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж